ଶ୍ରୀଜଗନ୍ନାଥ-ପ୍ରାର୍ଥନା
ଶ୍ରୀଜଗନ୍ନାଥ-ପ୍ରାର୍ଥନା
ଶୁଭଂ ସୁଭଦ୍ରା-ବଲଭଦ୍ର-ସଙ୍ଗତଂ
ନମାମି ନାଥଂ ଜଗତାଂ ବରେଣ୍ୟମ୍ ।
ଓଙ୍କାର-ରୂପଂ ଭୁବି ଦାରୁ-ଦୈବତଂ
ବେଦାନ୍ତ-ବେଦ୍ୟଂ ମହତାଂ ଶରଣ୍ୟମ୍ ॥ ୧॥
ନତୋଽସ୍ମି ବିଷ୍ଣୁଂ ହୃଦି ରାଜମାନଂ
ନୀଲାଦ୍ରି-ବାସଂ କରୁଣା-ନିଧାନମ୍ ।
ବୃନ୍ଦାରକୈ-ର୍ୱନ୍ଦିତ-ପାଦ-ପୁଷ୍କରଂ
ବ୍ରହ୍ମ-ସ୍ୱରୂପଂ ପୁରୁଷୋତ୍ତମଂ ପରମ୍ ॥ ୨॥
ଅପାଣି-ପାଦଂ ମନସାଂ ପ୍ରସାଦଂ
କୃଷ୍ଣଂ ଗୁଣାତୀତମଜଂ ସୁରେଶମ୍ ।
ତପୋଧନୈରର୍ଚିତ-ପୁଣ୍ୟପାଦଂ
ବନ୍ଦେ ବିଭୁଂ ତଂ ଧୃତ-ବିଶ୍ୱବେଶମ୍ ॥ ୩॥
ଲୀଲା ବିଚିତ୍ରା ତବ ମାନବାୟିତା
ଶାରୀରିକୀ ଭଙ୍ଗୁରତା ପ୍ରଦର୍ଶିତା ।
ବାର୍ତ୍ତାସ୍ତି ମର୍ତ୍ତ୍ୟେ ପରିବର୍ତ୍ତତେ ତନୁଃ
ସତ୍ୟଂ ହି ମୃତ୍ୟୁ-ର୍ନିୟତଂ ପୁନର୍ଜନୁଃ ॥ ୪॥
ପୁରାତନଂ ଦାରୁମୟଂ କଲେବରଂ
ତ୍ୟକ୍ତ୍ୱା ପ୍ରଭୋ ହେ ! ସମୟେ ସମାଗତେ ।
ଦଧାସି ଦେହଂ ନବଦାରୁ-ସୁନ୍ଦରଂ
ସାଂସାରିକୀ ରୀତିରିୟଂ ଜଗତ୍ପତେ ! ॥ ୫॥
ଲକ୍ଷ୍ମୀପତିଂ ଶଙ୍ଖ-ଗଦାବ୍ଜ-ଚକ୍ରିଣଂ
ଶ୍ରୀବାସୁଦେବଂ ଦୁରିତାପହାରିଣମ୍ ।
ରଥୋତ୍ସବେ ଦର୍ଶିତ-ଚାରୁ-ବିଗ୍ରହଂ
ଭକ୍ତ୍ୟା ତମୀଶଂ ଶିରସା ନମାମ୍ୟହମ୍ ॥ ୬॥
ପ୍ରଦେହି ଚିତ୍ତେ ବିମଲାବକାଶଂ
ଗତାନ୍ଧକାରଂ ବିତର ପ୍ରକାଶମ୍ ।
କୁରୁଷ୍ୱ ମେ କଲ୍ମଷରାଶି-ନାଶଂ
ହର ପ୍ରଭୋ ! ସଂସୃତି-ବନ୍ଧ-ପାଶମ୍ ॥ ୭॥
ମୈତ୍ରୀଂ ପ୍ରଶାନ୍ତିଂ ସୁଖଦାଂ ଚିରନ୍ତନଂ
ତନୋତୁ ବିଶ୍ୱେ ତବ ନାମ-ଚିନ୍ତନମ୍ ।
ଆତ୍ମୀୟତା-ରୂପ-ରସୋ ମହୀୟତାଂ
ପ୍ରଭୋ ଜଗନ୍ନାଥ ! କୃପା ବିଧୀୟତାମ୍ ॥ ୮॥
-- ରଚୟିତା : ଡାେ ହରେକୃଷ୍ଣ-ମେହେରଃ
Comments
Post a Comment