ଜୟଦେବକୃତଂ ଗୀତଗୋବିନ୍ଦଂ (ଅଷ୍ଟପଦୀ)
ଜୟଦେବକୃତଂ ଗୀତଗୋବିନ୍ଦଂ (ଅଷ୍ଟପଦୀ)
॥ ଗୀତଗୋବିନ୍ଦମ୍ ॥
॥ ଶ୍ରୀଗୋପାଲକଧ୍ୟାନମ୍ ॥
ଯଦ୍ଗୋପୀବଦନେନ୍ଦୁମଣ୍ଡନମଭୂତ୍କସ୍ତୂରିକାପତ୍ରକଂ
ଯଲ୍ଲକ୍ଷ୍ମୀକୁଚଶାତକୁମ୍ଭକଲଶେ ବ୍ୟାଗୋଚମିନ୍ଦୀବରମ୍ ।
ଯନ୍ନିର୍ୱାଣବିଧାନସାଧନବିଧୌ ସିଦ୍ଧାଞ୍ଜନଂ ଯୋଗିନାଂ
ତନ୍ନଃ ଶ୍ୟାମଳମାବିରସ୍ତୁ ହୃଦୟେ କୃଷ୍ଣାଭିଧାନଂ ମହଃ ॥ ୧॥
॥ ଶ୍ରୀଜୟଦେବଧ୍ୟାନମ୍ ॥
ରାଧାମନୋରମରମାବରରାସଲୀଲା-
ଗାନାମୃତୈକଭଣିତଂ କବିରାଜରାଜମ୍ ।
ଶ୍ରୀମାଧବାର୍ଚ୍ଚନବିଧାବନୁରାଗସଦ୍ମ-
ପଦ୍ମାବତୀପ୍ରିୟତମଂ ପ୍ରଣତୋଽସ୍ମି ନିତ୍ୟମ୍ ॥ ୨॥
ଶ୍ରୀଗୋପାଲବିଲାସିନୀ ବଲୟସଦ୍ରତ୍ନାଦିମୁଗ୍ଧାକୃତି
ଶ୍ରୀରାଧାପତିପାଦପଦ୍ମଭଜନାନନ୍ଦାବ୍ଧିମଗ୍ନୋଽନିଶମ୍ ।
ଲୋକେ ସତ୍କବିରାଜରାଜ ଇତି ଯଃ ଖ୍ୟାତୋ ଦୟାମ୍ଭୋନିଧିଃ
ତଂ ବନ୍ଦେ ଜୟଦେବସଦ୍ଗୁରୁମହଂ ପଦ୍ମାବତୀବଲ୍ଲଭମ୍ ॥ ୩॥
॥ ପ୍ରଥମଃ ସର୍ଗଃ ॥
॥ ସାମୋଦଦାମୋଦରଃ ॥
ଶ୍ଲୋକଃ ॥ ମେଘୈର୍ମେଦୁରମମ୍ବରଂ ବନଭୁବଃ ଶ୍ୟାମାସ୍ତମାଲଦ୍ରୁମୈ-
ର୍ନକ୍ତଂ ଭୀରୁରୟଂ ତ୍ୱମେବ ତଦିମଂ ରାଧେ ଗୃହଂ ପ୍ରାପୟ ।
ଇତ୍ଥଂ ନନ୍ଦନିଦେଶିତଶ୍ଚଲିତୟୋଃ ପ୍ରତ୍ୟଧ୍ୱକୁଞ୍ଜଦ୍ରୁମଂ
ରାଧାମାଧବୟୋର୍ଜୟନ୍ତି ଯମୁନାକୂଲେ ରହଃକେଲୟଃ ॥ ୧॥
ଶ୍ଲୋକଃ ॥ ବାଗ୍ଦେବତାଚରିତଚିତ୍ରିତଚିତ୍ତସଦ୍ମା
ପଦ୍ମାବତୀଚରଣଚାରଣଚକ୍ରବର୍ତୀ ।
ଶ୍ରୀବାସୁଦେବରତିକେଲିକଥାସମେତ-
ମେତଂ କରୋତି ଜୟଦେବକବିଃ ପ୍ରବନ୍ଧମ୍ ॥ ୨॥
ଶ୍ଲୋକଃ ॥ ବାଚଃ ପଲ୍ଲବୟତ୍ୟୁମାପତିଧରଃ ସନ୍ଦର୍ଭଶୁଦ୍ଧିଂ ଗିରାଂ
ଜାନୀତେ ଜୟଦେବ ଏବ ଶରଣଃ ଶ୍ଲାଘ୍ୟୋ ଦୁରୂହଦ୍ରୁତେ ।
ଶୃଙ୍ଗାରୋତ୍ତରସତ୍ପ୍ରମେୟରଚନୈରାଚାର୍ୟଗୋବର୍ଧନ-
ସ୍ପର୍ଧୀ କୋଽପି ନ ବିଶ୍ରୁତଃ ଶ୍ରୁତିଧରୋ ଧୋୟୀ କବିକ୍ଷ୍ମାପତିଃ ॥ ୩॥
ଶ୍ଲୋକଃ ॥ ଯଦି ହରିସ୍ମରଣେ ସରସଂ ମନୋ
ଯଦି ବିଲାସକଲାସୁ କୁତୂହଲମ୍ ।
ମଧୁରକୋମଲକାନ୍ତପଦାବଲୀଂ
ଶୃଣୁ ତଦା ଜୟଦେବସରସ୍ୱତୀମ୍ ॥ ୪॥
॥ ଗୀତମ୍ ୧ ॥
(ଅଥ ପ୍ରଥମପ୍ରବନ୍ଦୋ ମାଲବରାଗେଣ ରୂପକ ତାଲେ ଗୀୟତେ)
ପ୍ରଲୟପୟୋଧିଜଲେ ଧୃତବାନସି ବେଦମ୍ ।
ବିହିତବହିତ୍ରଚରିତ୍ରମଖେଦମ୍ ॥
କେଶବ ଧୃତମୀନଶରୀର ଜୟ ଜଗଦୀଶ ହରେ ॥ ୧॥
କ୍ଷିତିରତିବିପୁଲତରେ ତବ ତିଷ୍ଠତି ପୃଷ୍ଠେ ।
ଧରଣିଧରଣକିଣଚକ୍ରଗରିଷ୍ଠେ ॥
କେଶବ ଧୃତକଚ୍ଛପରୂପ ଜୟ ଜଗଦୀଶ ହରେ ॥ ୨॥
ବସତି ଦଶନଶିଖରେ ଧରଣୀ ତବ ଲଗ୍ନା ।
ଶଶିନି କଲଙ୍କକଲେବ ନିମଗ୍ନା ॥
କେଶବ ଧୃତସୂକରରୂପ ଜୟ ଜଗଦୀଶ ହରେ ॥ ୩॥
ତବ କରକମଲବରେ ନଖମଦ୍ଭୁତଶୃଙ୍ଗମ୍ ।
ଦଲିତହିରଣ୍ୟକଶିପୁତନୁଭୃଙ୍ଗମ୍ ॥
କେଶବ ଧୃତନରହରିରୂପ ଜୟ ଜଗଦୀଶ ହରେ ॥ ୪॥
ଛଲୟସି ବିକ୍ରମଣେ ବଲିମଦ୍ଭୁତବାମନ ।
ପଦନଖନୀରଜନିତଜନପାବନ ॥
କେଶବ ଧୃତବାମନରୂପ ଜୟ ଜଗଦୀଶ ହରେ ॥ ୫॥
କ୍ଷତ୍ରିୟରୁଧିରମୟେ ଜଗଦପଗତପାପମ୍ ।
ସ୍ନପୟସି ପୟସି ଶମିତଭବତାପମ୍ ॥
କେଶବ ଧୃତଭୃଗୁପତିରୂପ ଜୟ ଜଗଦୀଶ ହରେ ॥ ୬॥
ବିତରସି ଦିକ୍ଷୁ ରଣେ ଦିକ୍ପତିକମନୀୟମ୍ ।
ଦଶମୁଖମୌଲିବଲିଂ ରମଣୀୟମ୍ ॥
କେଶବ ଧୃତରାମଶରୀର ଜୟ ଜଗଦୀଶ ହରେ ॥ ୭॥
ବହସି ବପୁଷି ବିଶଦେ ବସନଂ ଜଲଦାଭମ୍ ।
ହଲହତିଭୀତିମିଲିତୟମୁନାଭମ୍ ॥
କେଶବ ଧୃତହଲଧରରୂପ ଜୟ ଜଗଦୀଶ ହରେ ॥ ୮॥
ନିନ୍ଦସି ଯଜ୍ଞବିଧେରହହ ଶ୍ରୁତିଜାତମ୍ ।
ସଦୟହୃଦୟଦର୍ଶିତପଶୁଘାତମ୍ ॥
କେଶବ ଧୃତବୁଦ୍ଧଶରୀର ଜୟ ଜଗଦୀଶ ହରେ ॥ ୯॥
ମ୍ଲେଚ୍ଛନିବହନିଧନେ କଲୟସି କରବାଲମ୍ ।
ଧୂମକେତୁମିବ କିମପି କରାଲମ୍ ॥
କେଶବ ଧୃତକଲ୍କିଶରୀର ଜୟ ଜଗଦୀଶ ହରେ ॥ ୧୦॥
ଶ୍ରୀଜୟଦେବକବେରିଦମୁଦିତମୁଦାରମ୍ ।
ଶୃଣୁ ସୁଖଦଂ ଶୁଭଦଂ ଭବସାରମ୍ ॥
କେଶବ ଧୃତଦଶବିଧରୂପ ଜୟ ଜଗଦୀଶ ହରେ ॥ ୧୧॥
ଶ୍ଲୋକଃ ॥ ବେଦାନୁଦ୍ଧରତେ ଜଗନ୍ନିବହତେ ଭୂଗୋଲମୁଦ୍ବିଭ୍ରତେ
ଦୈତ୍ୟାନ୍ଦାରୟତେ ବଲିଂ ଛଲୟତେ କ୍ଷତ୍ରକ୍ଷୟଂ କୁର୍ୱତେ ।
ପୌଲସ୍ତ୍ୟଂ ଜୟତେ ହଲଂ କଲୟତେ କାରୁଣ୍ୟମାତନ୍ୱତେ
ମ୍ଲେଚ୍ଛାନ୍ମୂର୍ଚ୍ଛୟତେ ଦଶାକୃତିକୃତେ କୃଷ୍ଣାୟ ତୁଭ୍ୟଂ ନମଃ ॥ ୫॥
॥ ଗୀତମ୍ ୨ ॥
(ଅଥ ଦ୍ୱିତୀୟପ୍ରବନ୍ଧୋ ଗୁର୍ଜରୀରାଗେଣ ପ୍ରତିମଠତାଲେ ଗୀୟତେ)
ଶ୍ରିତକମଲାକୁଚମଣ୍ଡଲ ଧୃତକୁଣ୍ଡଲ ଏ ।
କଲିତଲଲିତବନମାଲ ଜୟ ଜୟଦେବ ହରେ ॥ ୧॥
ଦିନମଣିମଣ୍ଡଲମଣ୍ଡନ ଭବଖଣ୍ଡନ ଏ ।
ମୁନିଜନମାନସହଂସ ଜୟ ଜୟଦେବ ହରେ ॥ ୨॥
କାଲିୟବିଷଧରଭଞ୍ଜନ ଜନରଞ୍ଜନ ଏ ।
ଯଦୁକୁଲନଲିନଦିନେଶ ଜୟ ଜୟଦେବ ହରେ ॥ ୩॥
ମଧୁମୁରନରକବିନାଶନ ଗରୁଡାସନ ଏ ।
ସୁରକୁଲକେଲିନିଦାନ ଜୟ ଜୟଦେବ ହରେ ॥ ୪॥
ଅମଲକମଲଦଲଲୋଚନ ଭବମୋଚନ ଏ ।
ତ୍ରିଭୁବନଭବନନିଧାନ ଜୟ ଜୟଦେବ ହରେ ॥ ୫॥
ଜନକସୁତାକୃତଭୂଷଣ ଜିତଦୂଷଣ ଏ ।
ସମରଶମିତଦଶକଣ୍ଠ ଜୟ ଜୟଦେବ ହରେ ॥ ୬॥
ଅଭିନବଜଲଧରସୁନ୍ଦର ଧୃତମନ୍ଦର ଏ ।
ଶ୍ରୀମୁଖଚନ୍ଦ୍ରଚକୋର ଜୟ ଜୟଦେବ ହରେ ॥ ୭॥
ତବ ଚରଣେ ପ୍ରଣତା ବୟଂ ଇତି ଭାବୟ ଏ ।
କୁରୁ କୁଶଲଂ ପ୍ରଣତେଷୁ ଜୟ ଜୟଦେବ ହରେ ॥ ୮॥
ଶ୍ରୀଜୟଦେବକବେରିଦଂ କୁରୁତେ ମୁଦମ୍ ଏ ।
ମଙ୍ଗଲମୁଜ୍ଜ୍ୱଲଗୀତଂ ଜୟ ଜୟଦେବ ହରେ ॥ ୯॥
ଶ୍ଲୋକଃ ॥ ପଦ୍ମାପୟୋଧରତଟୀପରିରମ୍ଭଲଗ୍ନ-
କାଶ୍ମୀରମୁଦ୍ରିତମୁରୋ ମଧୁସୂଦନସ୍ୟ ।
ବ୍ୟକ୍ତାନୁରାଗମିବ ଖେଲଦନଙ୍ଗଖେଦ-
ସ୍ୱେଦାମ୍ବୁପୂରମନୁପୂରୟତୁ ପ୍ରିୟଂ ବଃ ॥ ୬॥
ଶ୍ଲୋକଃ ॥ ବସନ୍ତେ ବାସନ୍ତୀକୁସୁମସୁକୁମାରୈରବୟବୈ-
ର୍ଭ୍ରମନ୍ତୀଂ କାନ୍ତାରେ ବହୁବିହିତକୃଷ୍ଣାନୁସରଣାମ୍ ।
ଅମନ୍ଦଂ କନ୍ଦର୍ପଜ୍ୱରଜନିତଚିନ୍ତାକୁଲତୟା
ବଲଦ୍ବାଧାଂ ରାଧାଂ ସରସମିଦମୁଚେ ସହଚରୀ ॥ ୭॥
॥ ଗୀତମ୍ ୩ ॥
(ଅଥ ତୃତୀୟପ୍ରବନ୍ଧୋ ବସନ୍ତରାଗେଣ ରୂପକତାଲେ ଗୀୟତେ)
ଲଲିତଲବଙ୍ଗଲତାପରିଶୀଲନକୋମଲମଲୟସମୀରେ ।
ମଧୁକରନିକରକରମ୍ବିତକୋକିଲକୂଜିତକୁଞ୍ଜକୁଟୀରେ ॥
ବିହରତି ହରିରିହ ସରସବସନ୍ତେ
ନୃତ୍ୟତି ଯୁବତିଜନେନ ସମଂ ସଖି ବିରହିଜନସ୍ୟ ଦୁରନ୍ତେ ॥ ୧॥ ବିହରତି
ଉନ୍ମଦମଦନମନୋରଥପଥିକବଧୂଜନଜନିତବିଲାପେ ।
ଅଲିକୁଲସଙ୍କୁଲକୁସୁମସମୂହନିରାକୁଲବକୁଲକଲାପେ ॥ ୨॥ ବିହରତି
ମୃଗମଦସୌରଭରଭସବଶଂବଦନବଦଲମାଲତମାଲେ ।
ଯୁବଜନହୃଦୟବିଦାରଣମନସିଜନଖରୁଚିକିଂଶୁକଜାଲେ ॥ ୩॥ ବିହରତି
ମଦନମହୀପତିକନକଦଣ୍ଡରୁଚିକେସରକୁସୁମବିକାସେ ।
ମିଲିତଶିଲୀମୁଖପାଟଲିପଟଲକୃତସ୍ମରତୂଣବିଲାସେ ॥ ୪॥ ବିହରତି
ବିଗଲିତଲଜ୍ଜିତଜଗଦବଲୋକନତରୁଣକରୁଣକୃତହାସେ ।
ବିରହିନିକୃନ୍ତନକୁନ୍ତମୁଖାକୃତିକେତକଦନ୍ତୁରିତାଶେ ॥ ୫॥ ବିହରତି
ମାଧବିକାପରିମଲଲଲିତେ ନବମାଲିକଜାତିସୁଗନ୍ଧୌ ।
ମୁନିମନସାମପି ମୋହନକାରିଣି ତରୁଣାକାରଣବନ୍ଧୌ ॥ ୬॥ ବିହରତି
ସ୍ଫୁରଦତିମୁକ୍ତଲତାପରିରମ୍ଭଣମୁକୁଲିତପୁଲକିତଚୂତେ ।
ବୃନ୍ଦାବନବିପିନେ ପରିସରପରିଗତୟମୁନାଜଲପୂତେ ॥ ୭॥ ବିହରତି
ଶ୍ରୀଜୟଦେବଭଣିତମିଦମୁଦୟତି ହରିଚରଣସ୍ମୃତିସାରମ୍ ।
ସରସବସନ୍ତସମୟବନବର୍ଣନମନୁଗତମଦନବିକାରମ୍ ॥ ୮॥ ବିହରତି
ଶ୍ଲୋକଃ ॥ ଦରବିଦଲିତମଲ୍ଲୀବଲ୍ଲିଚଞ୍ଚତ୍ପରାଗ-
ପ୍ରକଟିତପଟବାସୈର୍ୱାସୟନ୍ କାନନାନି ।
ଇହ ହି ଦହତି ଚେତଃ କେତକୀଗନ୍ଧବନ୍ଧୁଃ
ପ୍ରସରଦସମବାଣପ୍ରାଣବଦ୍ଗନ୍ଧବାହଃ ॥ ୮॥
ଶ୍ଲୋକଃ ॥ ଉନ୍ମୀଲନ୍ମଧୁଗନ୍ଧଲୁବ୍ଧମଧୁପବ୍ୟାଧୂତଚୂତାଙ୍କୁର-
କ୍ରୀଡତ୍କୋକିଲକାକଲୀକଲରବୈରୁଦ୍ଗୀର୍ଣକର୍ଣଜ୍ୱରାଃ । var - କଲୈଃ
ନୀୟନ୍ତେ ପଥିକୈଃ କଥଂ କଥମପି ଧ୍ୟାନାବଧାନକ୍ଷଣ-
ପ୍ରାପ୍ତପ୍ରାଣସମାସମାଗମରସୋଲ୍ଲାସୈରମୀ ବାସରାଃ ॥ ୯॥
ଶ୍ଲୋକଃ ॥ ଅନେକନାରୀପରିରମ୍ଭସମ୍ଭ୍ରମ-
ସ୍ଫୁରନ୍ମନୋହାରିବିଲାସଲାଲସମ୍ ।
ମୁରାରିମାରାଦୁପଦର୍ଶୟନ୍ତ୍ୟସୌ
ସଖୀସମକ୍ଷଂ ପୁନରାହ ରାଧିକାମ୍ ॥ ୧୦॥
॥ ଗୀତମ୍ ୪ ॥
(ଅଥ ଚତୁର୍ଥପ୍ରବନ୍ଧୋ ରାମକରିରାଗେଣ ରୂପକତାଲେ ଗୀୟତେ)
ଚନ୍ଦନଚର୍ଚିତନୀଲକଲେବରପୀତବସନବନମାଲୀ ।
କେଲିଚଲନ୍ମଣିକୁଣ୍ଡଲମଣ୍ଡିତଗଣ୍ଡୟୁଗସ୍ମିତଶାଲୀ ॥
ହରିରିହମୁଗ୍ଧବଧୂନିକରେ
ବିଲାସିନି ବିଲସତି କେଲିପରେ ॥ ୧॥
ପୀନପୟୋଧରଭାରଭରେଣ ହରିଂ ପରିରମ୍ୟ ସରାଗମ୍ ।
ଗୋପବଧୂରନୁଗାୟତି କାଚିଦୁଦଞ୍ଚିତପଞ୍ଚମରାଗମ୍ ॥ ୨॥ ହରିରିହ
କାପି ବିଲାସବିଲୋଲବିଲୋଚନଖେଲନଜନିତମନୋଜମ୍ ।
ଧ୍ୟାୟତି ମୁଗ୍ଧବଧୂରଧିକଂ ମଧୁସୂଦନବଦନସରୋଜମ୍ ॥ ୩॥ ହରିରିହ
କାପି କପୋଲତଲେ ମିଲିତା ଲପିତୁଂ କିମପି ଶ୍ରୁତିମୂଲେ ।
ଚାରୁ ଚୁଚୁମ୍ବ ନିତମ୍ବବତୀ ଦୟିତଂ ପୁଲକୈରନୁକୂଲେ ॥ ୪॥ ହରିରିହ
କେଲିକଲାକୁତୁକେନ ଚ କାଚିଦମୁଂ ଯମୁନାଜଲକୂଲେ ।
ମଞ୍ଜୁଲବଞ୍ଜୁଲକୁଞ୍ଜଗତଂ ବିଚକର୍ଷ କରେଣ ଦୁକୂଲେ ॥ ୫॥ ହରିରିହ
କରତଲତାଲତରଲବଲୟାବଲିକଲିତକଲସ୍ୱନବଂଶେ ।
ରାସରସେ ସହ ନୃତ୍ୟପରା ହରିଣା ଯୁବତିଃ ପ୍ରଶଶଂସେ ॥ ୬॥ ହରିରିହ
ଶ୍ଲିଷ୍ୟତି କାମପି ଚୁମ୍ବତି କାମପି କାମପି ରମୟତି ରାମାମ୍ ।
ପଶ୍ୟତି ସସ୍ମିତଚାରୁତରାମପରାମନୁଗଚ୍ଛତି ବାମାମ୍ ॥ ୭॥ ହରିରିହ var - ପରାଂ
ଶ୍ରୀଜୟଦେବକବେରିଦମଦ୍ଭୁତକେଶବକେଲିରହସ୍ୟମ୍ ।
ବୃନ୍ଦାବନବିପିନେ ଲଲିତଂ ବିତନୋତୁ ଶୁଭାନି ଯଶସ୍ୟମ୍ ॥ ୮॥ ହରିରିହ
ଶ୍ଲୋକଃ ॥ ବିଶ୍ୱେଷାମନୁରଞ୍ଜନେ ଜନୟନ୍ନାନନ୍ଦମିନ୍ଦୀବର-
ଶ୍ରେଣୀଶ୍ୟାମଲକୋମଲୈରୁପନୟନ୍ନଙ୍ଗୈରନଙ୍ଗୋତ୍ସବମ୍ ।
ସ୍ୱଚ୍ଛନ୍ଦଂ ବ୍ରଜସୁନ୍ଦରୀଭିରଭିତଃ ପ୍ରତ୍ୟଙ୍ଗମାଲିଙ୍କିତଃ
ଶୃଙ୍ଗାରଃ ସଖି ମୂର୍ତିମାନିବ ମଧୌ ମୁଗ୍ଧୋ ହରିଃ କ୍ରୀଡତି ॥ ୧୧॥
ଶ୍ଲୋକଃ ॥ ଅଦ୍ୟୋତ୍ସଙ୍ଗବସଦ୍ଭୁଜଙ୍ଗକବଲକ୍ଲେଶାଦିବେଶାଚଲଂ var - ନିତ୍ୟୋସଙ୍ଗ
ପ୍ରାଲେୟପ୍ଲବନେଚ୍ଛୟାନୁସରତି ଶ୍ରୀଖଣ୍ଡଶୈଲାନିଲଃ ।
କିଂ ଚ ସ୍ନିଗ୍ଧରସାଲମୌଲିମୁକୁଲାନ୍ୟାଲୋକ୍ୟ ହର୍ଷୋଦୟା-
ଦୁନ୍ମୀଲନ୍ତି କୁହୂଃ କୁହୂରିତି କଲୋତ୍ତଲାଃ ପିକାନାଂ ଗିରଃ ॥ ୧୨॥
ଶ୍ଲୋକଃ ॥ ରାସୋଲ୍ଲାସଭରେଣବିଭ୍ରମଭୃତାମାଭୀରବାମଭ୍ରୁବା-
ମଭ୍ୟର୍ଣେ ପରିରଭ୍ୟ ନିର୍ଭରମୁରଃ ପ୍ରେମାନ୍ଧୟା ରାଧୟା ।
ସାଧୁ ତ୍ୱଦ୍ୱଦନଂ ସୁଧାମୟମିତି ବ୍ୟାହୃତ୍ୟ ଗୀତସ୍ତୁତି-
ବ୍ୟାଜାଦୁଦ୍ଭଟଚୁମ୍ବିତସ୍ମିତମନୋହରୀ ହରିଃ ପାତୁ ବଃ ॥ ୧୩॥
॥ ଇତି ଶ୍ରୀଗୀତଗୋବିନ୍ଦେ ସାମୋଦଦାମୋଦରୋ ନାମ ପ୍ରଥମଃ ସର୍ଗଃ ॥
॥ ଦ୍ୱିତୀୟଃ ସର୍ଗଃ ॥
॥ ଅକ୍ଲେଶକେଶବଃ ॥
ଶ୍ଲୋକଃ ॥ ବିହରତି ବନେ ରାଧା ସାଧାରଣପ୍ରଣୟେ ହରୌ
ବିଗଲିତନିଜୋତ୍କର୍ଷାଦୀର୍ଷ୍ୟାବଶେନ ଗତାନ୍ୟତଃ ।
କ୍ୱଚିଦପି ଲତାକୁଞ୍ଜେ ଗୁଞ୍ଜନ୍ମଧୁବ୍ରତମଣ୍ଡଲୀ-
ମୁଖରଶିଖରେ ଲୀନା ଦୀନାପ୍ୟୁବାଚ ରହଃ ସଖୀମ୍ ॥ ୧୪॥
॥ ଗୀତମ୍ ୫ ॥
(ଅଥ ପ୍ରଞ୍ଚମପ୍ରବନ୍ଧୋ ଗୁର୍ଜରୀରାଗେଣ ରୂପକତାଲେ ଗୀୟତେ)
ସଞ୍ଚରଦଧରସୁଧାମଧୁରଧ୍ୱନିମୁଖରିତମୋହନବଂଶମ୍ ।
ଚଲିତଦୃଗଞ୍ଚଲଚଞ୍ଚଲମୌଲିକପୋଲବିଲୋଲବତଂସମ୍ ॥ ୧॥
ରାସେ ହରିମିହ ବିହିତବିଲାସଂ
ସ୍ମରତି ମନୋ ମମ କୃତପରିହାସମ୍ ॥ ଧ୍ରୁବମ୍॥
ଚନ୍ଦ୍ରକଚାରୁମୟୂରଶିଖଣ୍ଡକମଣ୍ଡଲବଲୟିତକେଶମ୍ ।
ପ୍ରଚୁରପୁରନ୍ଦରଧନୁରନୁରଞ୍ଜିତମେଦୁରମୁଦିରସୁବେଶମ୍ ॥ ୨॥ ରାସେ ହରିମିହ
ଗୋପକଦମ୍ବନିତମ୍ବବତୀମୁଖଚୁମ୍ବନଲମ୍ଭିତଲୋଭମ୍ ।
ବନ୍ଧୁଜୀବମଧୁରାଧରପଲ୍ଲବମୁଲ୍ଲସିତସ୍ମିତଶୋଭମ୍ ॥ ୩॥ ରାସେ ହରିମିହ
ବିପୁଲପୁଲକଭୁଜପଲ୍ଲବବଲୟିତବଲ୍ଲବୟୁବତିସହସ୍ରମ୍ ।
କରଚରଣୋରସି ମଣିଗଣଭୂଷଣକିରଣବିଭିନ୍ନତମିସ୍ରମ୍ ॥ ୪॥ ରାସେ ହରିମିହ
ଜଲଦପଟଲଚଲଦିନ୍ଦୁବିନନ୍ଦକଚନ୍ଦନତିଲକଲଲାଟମ୍ ।
ପୀନଘନସ୍ତନମଣ୍ଡଲମର୍ଦନନିର୍ଦୟହୃଦୟକପାଟମ୍ ॥ ୫॥ ରାସେ ହରିମିହ var - ପୀନପୟୋଧରପରିସର
ମଣିମୟମକରମନୋହରକୁଣ୍ଡଲମଣ୍ଡିତଗଣ୍ଡମୁଦାରମ୍ ।
ପୀତବସନମନୁଗତମୁନିମନୁଜସୁରାସୁରବରପରିବାରମ୍ ॥ ୬॥ ରାସେ ହରିମିହ
ବିଶଦକଦମ୍ବତଲେ ମିଲିତଂ କଲିକଲୁଷଭୟଂ ଶମୟନ୍ତମ୍ ।
ମାମପି କିମପି ତରଙ୍ଗଦନଙ୍ଗଦୃଶା ମନସା ରମୟନ୍ତମ୍ ॥ ୭॥ ରାସେ ହରିମିହ var - ବପୁଷା
ଶ୍ରୀଜୟଦେବଭଣିତମତିସୁନ୍ଦରମୋହନମଧୁରିପୁରୂପମ୍ ।
ହରିଚରଣସ୍ମରଣଂ ପ୍ରତି ସମ୍ପ୍ରତି ପୁଣ୍ୟବତାମନୁରୂପମ୍ ॥ ୮॥ ରାସେ ହରିମିହ
ଶ୍ଲୋକଃ ॥ ଗଣୟତି ଗୁଣଗ୍ରାମଂ ଭ୍ରାମଂ ଭ୍ରମାଦପି ନେହତେ
ବହତି ଚ ପରିତୋଷଂ ଦୋଷଂ ବିମୁଞ୍ଚତି ଦୂରତଃ ।
ଯୁବତିଷୁ ବଲସ୍ତୃଷ୍ଣେ କୃଷ୍ଣେ ବିହାରିଣି ମାଂ ବିନା
ପୁନରପି ମନୋ ବାମଂ କାମଂ କରୋତି କରୋମି କିମ୍ ॥ ୧୫॥
॥ ଗୀତମ୍ ୬ ॥
(ଅଥ ଷଷ୍ଠପ୍ରବନ୍ଧୋ ମାଲବରାଗେଣ ଏକତାଲୀରାଲେ ଗୀୟତେ)
ନିଭୃତନିକୁଞ୍ଜଗୃହଂ ଗତୟା ନିଶି ରହସି ନିଲୀୟ ବସନ୍ତମ୍ ।
ଚକିତବିଲୋକିତସକଲଦିଶା ରତିରଭସରସେନ ହସନ୍ତମ୍ ॥
ସଖି ହେ କେଶିମଥନମୁଦାରଂ
ରମୟ ମୟା ସହ ମଦନମନୋରଥଭାବିତୟା ସବିକାରମ୍ ॥ ୧॥
ପ୍ରଥମସମାଗମଲଜ୍ଜିତୟା ପଟୁଚାଟୁଶତୈରନୁକୂଲମ୍ ।
ମୃଦୁମଧୁରସ୍ମିତଭାଷିତୟା ଶିଥିଲୀକୃତଜଧନଦୁକୂଲମ୍ ॥ ୨॥ ସଖି ହେ
କିସଲୟଶୟନନିବେଶିତୟା ଚିରମୁରସି ମମୈବ ଶୟାନମ୍ ।
କୃତପରିରମ୍ଭଣଚୁମ୍ବନୟା ପରିରଭ୍ୟ କୃତାଧରପାନମ୍ ॥ ୩॥ ସଖି ହେ
ଅଲସନିମୀଲିତଲୋଚନୟା ପୁଲକାବଲିଲଲିତକପୋଲମ୍ ।
ଶ୍ରମଜଲସକଲକଲେବରୟା ବରମଦନମଦାଦତିଲୋଲମ୍ ॥ ୪॥ ସଖି ହେ
କୋକିଲକଲରବକୂଜିତୟା ଜିତମନସିଜତନ୍ତ୍ରବିଚାରମ୍ ।
ଶ୍ଲଥକୁସୁମାକୁଲକୁନ୍ତଲୟା ନଖଲିଖିତଘନସ୍ତନଭାରମ୍ ॥ ୫॥ ସଖି ହେ
ଚରଣରଣିତମଣିନୂପୁରୟା ପରିପୂରିତସୁରତବିତାନମ୍ ।
ମୁଖରବିଶୃଙ୍ଖଲମେଖଲୟା ସକଚଗ୍ରହଚୁମ୍ବନଦାନମ୍ ॥ ୬॥ ସଖି ହେ
ରତିସୁଖସମୟରସାଲସୟା ଦରମୁକୁଲିତନୟନସରୋଜମ୍ ।
ନିଃସହନିପତିତତନୁଲତୟା ମଧୁସୂଦନମୁଦିତମନୋଜମ୍ ॥ ୭॥ ସଖି ହେ
ଶ୍ରୀଜୟଦେବଭଣିତମିଦମତିଶୟମଧୁରିପୁନିଧୁବନଶୀଲମ୍ ।
ସୁଖମୁତ୍କଣ୍ଠିତଗୋପବଧୂକଥିତଂ ବିତନୋତୁ ସଲୀଲମ୍ ॥ ୮॥ ସଖି ହେ var - ରାଧିକୟା
ଶ୍ଲୋକଃ ॥ ହସ୍ତସ୍ରସ୍ତବିଲାସବଂଶମନୃଜୁଭ୍ରୂବଲ୍ଲିମଦ୍ବଲ୍ଲବୀ-
ବୃନ୍ଦୋତ୍ସାରିଦୃଗନ୍ତବୀକ୍ଷିତମତିସ୍ୱେଦାର୍ଦ୍ରଗଣ୍ଡସ୍ଥଲମ୍ ।
ମାମୁଦ୍ୱୀକ୍ଷ୍ୟ ବିଲକ୍ଷିତଂ ସ୍ମିତସୁଧାମୁଗ୍ଧାନନଂ କାନନେ
ଗୋବିନ୍ଦଂ ବ୍ରଜସୁନ୍ଦରୀଗଣବୃତଂ ପଶ୍ୟାମି ହୃଷ୍ୟାମି ଚ ॥ ୧୬॥
ଶ୍ଲୋକଃ ॥ ଦୁରାଲୋକସ୍ତୋକସ୍ତବକନବକାଶୋକଲତିକା-
ବିକାସଃ କାସାରୋପବନପବନୋଽପି ବ୍ୟଥୟତି ।
ଅପି ଭ୍ରାମ୍ୟଦ୍ଭୃଙ୍ଗୀରଣିତରମଣୀୟା ନ ମୁକୁଲ-
ପ୍ରସୂତିଶ୍ଚୂତାନାଂ ସଖି ଶିଖରିଣୀୟଂ ସୁଖୟତି ॥ ୧୭॥
ଶ୍ଲୋକଃ ॥ ସାକୂତସ୍ମିତମାକୁଲାକୁଲଗଲଦ୍ଧମ୍ମିଲ୍ଲମୁଲ୍ଲାସିତ-
ଭ୍ରୂବଲ୍ଲୀକମଲୀକଦର୍ଶିତଭୁଜାମୂଲାର୍ଦ୍ଧପୃଷ୍ଠସ୍ତନମ୍ ।
ଗୋପୀନାଂ ନିଭୃତଂ ନିରୀକ୍ଷ୍ୟ ଗମିତାକାଙ୍କ୍ଷଶ୍ଚିରଂ ଚିନ୍ତୟ-
ନ୍ନନ୍ତର୍ମୁଗ୍ଦ୍ଧମନୋହରୋ ହରତୁ ବଃ କ୍ଲେଶଂ ନ ବଃ କେଶବଃ ॥ ୧୮॥
॥ ଇତି ଗୀତଗୋବିନ୍ଦେ ଅକ୍ଲେଶକେଶବୋ ନାମ ଦ୍ୱିତୀୟଃ ସର୍ଗଃ ॥
॥ ତୃତୀୟଃ ସର୍ଗଃ ॥
॥ ମୁଗ୍ଧମଧୁସୂଦନଃ ॥
ଶ୍ଲୋକଃ ॥ କଂସାରିରପି ସଂସାରବାସନାବନ୍ଧଶୃଙ୍ଖଲାମ୍ ।
ରାଧାମାଧାୟ ହୃଦୟେ ତତ୍ୟାଜ ବ୍ରଜସୁନ୍ଦରୀଃ ॥ ୧୯॥
ଶ୍ଲୋକଃ ॥ ଇତସ୍ତତସ୍ତାମନୁସୃତ୍ୟ ରାଧିକା-
ମନଙ୍ଗବାଣବ୍ରଣଖିନ୍ନମାନସଃ ।
କୃତାନୁତାପଃ ସ କଲିନ୍ଦନନ୍ଦିନୀ-
ତଟାନ୍ତକୁଞ୍ଜେ ନିଷସାଦ ମାଧବଃ ॥ ୨୦॥
॥ ଗୀତମ୍ ୭ ॥
(ଅଥ ସପ୍ତମବନ୍ଧଃ ଗୁର୍ଜରୀରାଗେଣ ପ୍ରତିମଣ୍ଠ୍ତାଲେ ଗୀୟତେ)
ମାମିୟଂ ଚଲିତା ବିଲୋକ୍ୟ ବୃତଂ ବଧୂନିଚୟେନ ।
ସାପରାଧତୟା ମୟାପି ନ ବାରିତାତିଭୟେନ ।
ହରିହରି ହତାଦରତୟା ସା ଗତା କୁପିତେବ ॥ ୧॥
କିଂ କରିଷ୍ୟତି କିଂ ବଦିଷ୍ୟତି ସା ଚିରଂ ବିରହେଣ ।
କିଂ ଧନେନ ଜନେନ କିଂ ମମ ଜୀବନେନ ଗୃହେଣ ॥ ୨॥ ହରିହରି
ଚିନ୍ତୟାମି ତଦାନନଂ କୁଟିଲଭ୍ରୁ କୋପଭରେଣ ।
ଶୋଣପଦ୍ମମିବୋପରି ଭ୍ରମତାକୁଲଭ୍ରମରେଣ ॥ ୩॥ ହରିହରି
ତାମହଂ ହୃଦି ସଙ୍ଗତାମନିଶଂ ଭୃଶଂ ରମୟାମି ।
କିଂ ବନେଽନୁସରାମି ତାମିହ କିଂ ବୃଥା ବିଲପାମି ॥ ୪॥ ହରିହରି
ତନ୍ୱି ଖିନ୍ନମସୂୟଯା ହୃଦୟଂ ତବାକଲୟାମି ।
ତନ୍ନ ବେଦ୍ମି କୁତୋ ଗତାସି ନ ତେନ ତେଽନୁନୟାମି ॥ ୫॥ ହରିହରି
ଦୃଶ୍ୟସେ ପୁରତୋ ଗତାଗତମେବ ତେ ବିଦଧାସି ।
କିଂ ପୁରେବ ସସମ୍ଭ୍ରମଂ ପରିରମ୍ଭଣଂ ନ ଦଦାସି ॥ ୬॥ ହରିହରି
କ୍ଷମ୍ୟତାମପରଂ କଦାପି ତବେଦୃଶଂ ନ କରୋମି ।
ଦେହି ସୁନ୍ଦରି ଦର୍ଶନଂ ମମ ମନ୍ମଥେନ ଦୁନୋମି ॥ ୭॥ ହରିହରି
ବର୍ଣିତଂ ଜୟଦେବକେନ ହରେରିଦଂ ପ୍ରବଣେନ ।
କିନ୍ଦୁବିଲ୍ୱସମୁଦ୍ରସମ୍ଭବରୋହିଣୀରମଣେନ ॥ ୮॥ ହରିହରି
ଶ୍ଲୋକଃ ॥ କୁବଲୟଦଲଶ୍ରେଣୀ କଣ୍ଠେ ନ ସା ଗରଲଦ୍ୟୁତିଃ
ହୃଦି ବିସଲତାହାରୋ ନାୟଂ ଭୁଜଙ୍ଗମନାୟକଃ ।
ମଲୟଜରଜୋ ନେଦଂ ଭସ୍ମ ପ୍ରିୟାରହିତେ ମୟି
ପ୍ରହର ନ ହରଭ୍ରାନ୍ତ୍ୟାନଙ୍ଗ କ୍ରୁଧା କିମୁ ଧାବସି ॥ ୨୧॥
ଶ୍ଲୋକଃ ॥ ପାଣୌ ମା କୁରୁ ଚୂତସାୟକମମୁଂ ମା ଚାପମାରୋପୟ
କ୍ରୀଡାନିର୍ଜିତବିଶ୍ୱମୂର୍ଛିତଜନାଘାତେନ କିଂ ପୌରୁଷମ୍ ।
ତସ୍ୟା ଏବ ମୃଗୀଦୃଶୋ ମନସିଜପ୍ରେଙ୍ଖତ୍କଟାକ୍ଷାଶୁଗ-
ଶ୍ରେଣୀଜର୍ଜରିତଂ ମନାଗପି ମନୋ ନାଦ୍ୟାପି ସନ୍ଧୁକ୍ଷତେ ॥ ୨୨॥
ଶ୍ଲୋକଃ ॥ ଭ୍ରୂଚାପେ ନିହିତଃ କଟାକ୍ଷବିଶିଖୋ ନିର୍ମାତୁ ମର୍ମବ୍ୟଥାଂ
ଶ୍ୟାମାତ୍ମା କୁଟିଲଃ କରୋତୁ କବରୀଭାରୋଽପି ମାରୋଦ୍ୟମମ୍ ।
ମୋହଂ ତାବଦୟଂ ଚ ତନ୍ୱି ତନୁତାଂ ବିମ୍ବାଧରୋ ରାଗବାନ୍
ସଦ୍ୱୃତ୍ତସ୍ତନମଣ୍ଡଲସ୍ତବ କଥଂ ପ୍ରାଣୈର୍ମମ କ୍ରୀଡତି ॥ ୨୩॥
ଶ୍ଲୋକଃ ॥ ତାନି ସ୍ପର୍ଶସୁଖାନି ତେ ଚ ତରଲସ୍ନିଗ୍ଧା ଦୃଶୋର୍ୱିଭ୍ରମା-
ସ୍ତଦ୍ୱକ୍ତ୍ରାମ୍ବୁଜସୌରଭଂ ସ ଚ ସୁଧାସ୍ୟନ୍ଦିର୍ଗିରାଂ ବକ୍ରିମା ।
ସା ବିମ୍ବାଧରମାଧୁରୀତି ବିଷୟାସଙ୍ଗେଽପି ଚେନ୍ମାନସଂ
ତସ୍ୟାଂ ଲଗ୍ନସମାଧି ହନ୍ତ ବିରହବ୍ୟାଧିଃ କଥଂ ବର୍ଧତେ ॥ ୨୪॥
ଶ୍ଲୋକଃ ॥ ଭ୍ରୂପଲ୍ଲବଂ ଧନୁରପାଙ୍ଗତରଙ୍ଗିତନି var - ଭ୍ରୂବଲ୍ଲରିର୍ଧନୁ
ବାଣା ଗୁଣଃ ଶ୍ରବଣପାଲିରିତି ସ୍ମରେଣ ।
ଅସ୍ୟାମନଙ୍ଗଜୟଜଙ୍ଗମଦେବତାୟାଂ
ଅସ୍ତ୍ରାଣି ନିର୍ଜିତଜଗନ୍ତି କିମର୍ପିତାନି ॥ ୨୫॥
ଶ୍ଲୋକଃ ॥ ତିର୍ୟକ୍କଣ୍ଠବିଲୋଲମୌଲିତରଲୋତ୍ତଂସସ୍ୟ ବଂଶୋଚ୍ଚଲଦ୍-
ଗୀତିସ୍ଥାନକୃତାବଧାନଲଲନାଲକ୍ଷୈର୍ନ ସଂଲକ୍ଷିତାଃ ।
ସମ୍ମୁଗ୍ଦ୍ଧେ ମଧୁସୂଦନସ୍ୟ ମଧୁରେ ରାଧାମୁଖେନ୍ଦୌ ମୃଦୁ-
ସ୍ପନ୍ଦଂ କନ୍ଦଲିତାଶ୍ଚିରଂ ଦଦତୁ ବଃ କ୍ଷେମଂ କଟାକ୍ଷୋର୍ମୟଃ ॥ ୨୬ ॥
॥ ଇତି ଶ୍ରୀଗିତଗୋବିନ୍ଦେ ମୁଗ୍ଧମଧୁସୂଦନୋ ନାମ ତୃତୀୟଃ ସର୍ଗଃ ॥
॥ ଚତୁର୍ଥଃ ସର୍ଗଃ ॥
॥ ସ୍ନିଗ୍ଧମଧୁସୂଦନଃ ॥
ଶ୍ଲୋକଃ ॥ ଯମୁନାତୀରବାନୀରନିକୁଞ୍ଜେ ମନ୍ଦମାସ୍ଥିତମ୍ ।
ପ୍ରାହ ପ୍ରେମଭରୋଦ୍ଭ୍ରାନ୍ତଂ ମାଧବଂ ରାଧିକାସଖୀ ॥ ୨୭॥
॥ ଗୀତମ୍ ୮ ॥
(ଅଥ ଅଷ୍ଟମପ୍ରବନ୍ଧଃ କର୍ଣାଟକରାଗେଣ ଏକତାଲୀତାଲେ ଗୀୟତେ)
ନିନ୍ଦତି ଚନ୍ଦନମିନ୍ଦୁକିରଣମନୁ ବିନ୍ଦତି ଖେଦମଧୀରମ୍ ।
ବ୍ୟାଲନିଲୟମିଲନେନ ଗରଲମିବ କଲୟତି ମଲୟସମୀରମ୍ ॥
ମାଧବ ମନସିଜବିଶିଖଭୟାଦିବ ଭାବନୟା ତ୍ୱୟି ଲୀନା
ସା ବିରହେ ତବ ଦୀନା ॥ ୧॥
ଅବିରଲନିପତିତମଦନଶରାଦିବ ଭବଦବନାୟ ବିଶାଲମ୍ ।
ସ୍ୱହୃଦୟମର୍ମଣୀ ବର୍ମ କରୋତି ସଜଲନଲିନୀଦଲଜାଲମ୍ ॥ ୨॥ ସା ବିରହେ ତବ ଦୀନା
କୁସୁମବିଶିଖଶରତଲ୍ପମନଲ୍ପବିଲାସକଲାକମନୀୟମ୍ ।
ବ୍ରତମିବ ତବ ପରିରମ୍ଭସୁଖାୟ କରୋତି କୁସୁମଶୟନୀୟମ୍ ॥ ୩॥ ସା ବିରହେ ତବ ଦୀନା
ବହତି ଚ ଗଲିତବିଲୋଚନଜଲଭରମାନନକମଲମୁଦାରମ୍ । var - ବିଗଲିତଲୋଚନ
ବିଧୁମିବ ବିକଟବିଧୁନ୍ତୁଦଦନ୍ତଦଲନଗଲିତାମୃତଧାରମ୍ ॥ ୪॥ ସା ବିରହେ ତବ ଦୀନା
ବିଲିଖତି ରହସି କୁରଙ୍ଗମଦେନ ଭବନ୍ତମସମଶରଭୂତମ୍ ।
ପ୍ରଣମତି ମକରମଧୋ ବିନିଧାୟ କରେ ଚ ଶରଂ ନବଚୂତମ୍ ॥ ୫॥ ସା ବିରହେ ତବ ଦୀନା
ପ୍ରତିପଦମିଦମପି ନିଗଦତି ମାଧବ ତବ ଚରଣେ ପତିତାହମ୍ ।
ତ୍ୱୟି ବିମୁଖେ ମୟି ସପଦି ସୁଧାନିଧିରପି ତନୁତେ ତନୁଦାହମ୍ ॥ ୬॥ ସା ବିରହେ ତବ ଦୀନା
ଧ୍ୟାନଲୟେନ ପୁରଃ ପରିକଲ୍ପ୍ୟ ଭବନ୍ତମତୀବ ଦୁରାପମ୍ ।
ବିଲପତି ହସତି ବିଷୀଦତି ରୋଦିତି ଚଞ୍ଚତି ମୁଞ୍ଚତି ତାପମ୍ ॥ ୭॥ ସା ବିରହେ ତବ ଦୀନା
ଶ୍ରୀଜୟଦେବଭଣିତମିଦମଧିକଂ ଯଦି ମନସା ନଟନୀୟମ୍ ।
ହରିବିରହାକୁଲବଲ୍ଲବୟୁବତିସଖୀବଚନଂ ପଠନୀୟମ୍ ॥ ୮॥ ସା ବିରହେ ତବ ଦୀନା
ଶ୍ଲୋକଃ ॥ ଆବାସୋ ବିପିନାୟତେ ପ୍ରିୟସଖୀମାଲାପି ଜାଲାୟତେ
ତାପୋଽପି ଶ୍ୱସିତେନ ଦାବଦହନଜ୍ୱାଲାକଲାପାୟତେ ।
ସାପି ତ୍ୱଦ୍ୱିରହେଣ ହନ୍ତ ହରିଣୀରୂପାୟତେ ହା କଥଂ
କନ୍ଦର୍ପୋଽପି ଯମାୟତେ ବିରଚୟଞ୍ଶାର୍ଦୂଲବିକ୍ରୀଡିତମ୍ ॥ ୨୮॥
॥ ଗୀତମ୍ ୯ ॥
(ଅଥ ନବମଃ ପ୍ରବନ୍ଧୋ ଦେଶାଖରାଗେଣ ଏକତାଲୀର୍ତାଲେ ଗୀୟତେ)
ସ୍ତନବିନିହିତମପି ହାରମୁଦାରମ୍ ।
ସା ମନୁତେ କୃଶତନୁରତିଭାରମ୍ ॥
ରାଧିକା ବିରହେ ତବ କେଶବ ॥ ୧॥
ସରସମସୃଣମପି ମଲୟଜପଙ୍କମ୍ ।
ପଶ୍ୟତି ବିଷମିବ ବପୁଷି ସଶଙ୍କମ୍ ॥ ୨॥ ରାଧିକା
ଶ୍ୱସିତପବନମନୁପମପରିଣାହମ୍ ।
ମଦନଦହନମିବ ବହତି ସଦାହମ୍ ॥ ୩॥ ରାଧିକା
ଦିଶି ଦିଶି କିରତି ସଜଲକଣଜାଲମ୍ ।
ନୟନନଲିନମିବ ବିଗଲିତନାଲମ୍ ॥ ୪॥ ରାଧିକା
ନୟନବିଷୟମପି କିସଲୟତଲ୍ପମ୍ ।
କଲୟତି ବିହିତହୁତାଶବିକଲ୍ପମ୍ ॥ ୫॥ ରାଧିକା
ତ୍ୟଜତି ନ ପାଣିତଲେନ କପୋଲମ୍ ।
ବାଲଶଶିନମିବ ସାୟମଲୋଲମ୍ ॥ ୬॥ ରାଧିକା
ହରିରିତି ହରିରିତି ଜପତି ସକାମମ୍ ।
ବିରହବିହିତମରଣେନ ନିକାମମ୍ ॥ ୭॥ ରାଧିକା
ଶ୍ରୀଜୟଦେବଭଣିତମିତି ଗୀତମ୍ ।
ସୁଖୟତୁ କେଶବପଦମୁପନୀତମ୍ ॥ ୮॥ ରାଧିକା
ଶ୍ଲୋକଃ ॥ ସା ରୋମାଞ୍ଚତି ସୀତ୍କରୋତି ବିଲପତ୍ୟୁତ୍କମ୍ପତେ ତାମ୍ୟତି
ଧ୍ୟାୟତ୍ୟୁଦ୍ଭ୍ରମତି ପ୍ରମୀଲତି ପତତ୍ୟୁଦ୍ୟାତି ମୂର୍ଚ୍ଛତ୍ୟପି ।
ଏତାବତ୍ୟତନୁଜ୍ୱରେ ବରତନୁର୍ଜୀବେନ୍ନ କିଂ ତେ ରସାତ୍
ସ୍ୱର୍ୱୈଦ୍ୟପ୍ରତିମ ପ୍ରସୀଦସି ଯଦି ତ୍ୟକ୍ତୋଽନ୍ୟଥା ନାନ୍ତକଃ ॥ ୨୯॥ var - ତ୍ୟକ୍ତାନ୍ୟଥାନ୍ୟତ୍ପରଂ
ଶ୍ଲୋକଃ ॥ ସ୍ମରାତୁରାଂ ଦୈବତବୈଦ୍ୟହୃଦ୍ୟ
ତ୍ୱଦଙ୍ଗସଙ୍ଗାମୃତମାତ୍ରସାଧ୍ୟାମ୍ ।
ବିମୁକ୍ତବାଧାଂ କୁରୁଷେ ନ ରାଧା-
ମୁପେନ୍ଦ୍ରବଜ୍ରାଦପି ଦାରୁଣୋଽସି ॥ ୩୦॥
ଶ୍ଲୋକଃ ॥ କନ୍ଦର୍ପଜ୍ୱରସଞ୍ଜ୍ୱରସ୍ତୁରତନୋରାଶ୍ଚର୍ୟମସ୍ୟାଶ୍ଚିରଂ var - ସଜ୍ଜ୍ୱରାତୁରତନୋରତ୍ୟର୍ଥମସ୍ୟାଶ୍ଚିରଂ
ଚେତଶ୍ଚନ୍ଦନଚନ୍ଦ୍ରମଃକମଲିନୀଚିନ୍ତାସୁ ସନ୍ତାମ୍ୟତି ।
କିନ୍ତୁ କ୍ଲାନ୍ତିବଶେନ ଶୀତଲତନୁଂ ତ୍ୱାମେକମେବ ପ୍ରିୟଂ
ଧ୍ୟାୟନ୍ତୀ ରହସି ସ୍ଥିତା କଥମପି କ୍ଷୀଣା କ୍ଷଣଂ ପ୍ରାଣିତି ॥ ୩୧॥
ଶ୍ଲୋକଃ ॥ କ୍ଷଣମପି ବିରହଃ ପୁରା ନ ସେହେ
ନୟନନିମୀଲନଖିନ୍ନୟା ଯୟା ତେ ।
ଶ୍ୱସିତି କଥମସୌ ରସାଲଶାଖାଂ
ଚିରବିରହେଣ ବିଲୋକ୍ୟ ପୁଷ୍ପିତାଗ୍ରାମ୍ ॥ ୩୨॥ var - ବିରହେଽପି
ଶ୍ଲୋକଃ ॥ ବୃଷ୍ଟିବ୍ୟାକୁଲଗୋକୁଲାବନରସାଦୁଦ୍ଧୃତ୍ୟ ଗୋବର୍ଧନଂ
ବିଭ୍ରଦ୍ୱଲ୍ଲବବଲ୍ଲଭାଭିରଧିକାନନ୍ଦାଚ୍ଚିରଂ ଚୁମ୍ବିତଃ ।
ଦର୍ପେଣେବ ତଦର୍ପିତାଧରତଟୀସିନ୍ଦୂରମୁଦ୍ରାଙ୍ଗିତୋ var କନ୍ଦର୍ପେଣ
ବାହୁର୍ଗୋପପତେସ୍ତନୋତୁ ଭବତାଂ ଶ୍ରେୟାଂସି କଂସଦ୍ୱିଷଃ ॥ ୩୩ ॥
॥ ଇତି ଗୀତଗୋବିନ୍ଦେ ସ୍ନିଗ୍ଧମାଧବୋ ନାମ ଚତୁର୍ଥଃ ସର୍ଗଃ ॥
॥ ପଞ୍ଚମଃ ସର୍ଗଃ ॥
॥ ସାକାଙ୍କ୍ଷପୁଣ୍ଡରୀକାକ୍ଷଃ ॥
ଶ୍ଲୋକଃ ॥ ଅହମିହ ନିବସାମି ଯାହି ରାଧାମନୁନୟ ମଦ୍ୱଚନେନ ଚାନୟେଥାଃ ।
ଇତି ମଧୁରିପୁଣା ସଖୀ ନିୟୁକ୍ତା ସ୍ୱୟମିଦମେତ୍ୟ ପୁନର୍ଜଗାଦ ରାଧାମ୍ ॥ ୩୪॥
॥ ଗୀତମ୍ ୧୦ ॥
(ଅଥ ଦଶମପ୍ରବନ୍ଧୋ ବରାଡିରାଗେଣ ରୂପକତାଲେ ଗୀୟତେ)
ବହତି ମଲୟସମୀରେ ମଦନମୁପନିଧାୟ ।
ସ୍ଫୁଟତି କୁସୁମନିକରେ ବିରହିହୃଦୟଦଲନାୟ ॥
ତବ ବିରହେ ବନମାଲୀ ସଖି ସୀଦତି ॥ ୧॥
ଦହତି ଶିଶିରମୟୂଖେ ମରଣମନୁକରୋତି ।
ପତତି ମଦନବିଶିଖେ ବିଲପତି ବିକଲତରୋଽତି ॥ ୨॥ ତବ ବିରହେ
ଧ୍ୱନତି ମଧୁପସମୂହେ ଶ୍ରବଣମପି ଦଧାତି ।
ମନସି ବଲିତବିରହେ ନିଶି ନିଶି ରୁଜମୁପୟାତି ॥ ୩॥ ତବ ବିରହେ
ବସତି ବିପିନବିତାନେ ତ୍ୟଜତି ଲଲିତଧାମ ।
ଲୁଠତି ଧରଣିଶୟନେ ବହୁ ବିଲପତି ତବ ନାମ ॥ ୪॥ ତବ ବିରହେ
ରଣତି ପିକସମୁଦାୟେ ପ୍ରତିଦିଶମନୁୟାତି ।
ହସତି ମନୁଜନିଚୟେ ବିରହମପଲପତି ନେତି ॥ ୫॥ ତବ ବିରହେ
ସ୍ଫୁରତି କଲରବରାବେ ସ୍ମରତି ଭଣିତମେବ ।
ତବ ରତିସୁଖବିଭବେ ବହୁଗଣୟତି ଗୁଣମତୀବ ॥ ୬॥ ତବ ବିରହେ
ତ୍ୱଦଭିଦଶୁଭଦମାସଂ ବଦତୁ ନରି ଶୃଣୋତି ।
ତମପି ଜପତି ସରସଂ ପରୟୁବତିଷୁ ନ ରତିମୁପୈତି ॥ ୭॥ ତବ ବିରହେ
ଭଣତି କବିଜୟଦେବେ ବିରହିବିଲସିତେନ ।
ମନସି ରଭସବିଭବେ ହରିରୁଦୟତୁ ସୁକୃତେନ ॥ ୮॥ ତବ ବିରହେ
ଶ୍ଲୋକଃ ॥ ପୂର୍ୱଂ ଯତ୍ର ସମଂ ତ୍ୱୟା ରତିପତେରାସାଦିତାଃ ସିଦ୍ଧୟ-
ସ୍ତସ୍ମିନ୍ନେବ ନିକୁଞ୍ଜମନ୍ମଥମହାତୀର୍ଥେ ପୁନର୍ମାଧବଃ ।
ଧ୍ୟାୟଂସ୍ତ୍ୱାମନିଶଂ ଜପନ୍ନପି ତବୈବାଲାପମନ୍ତ୍ରାବଲୀଂ
ଭୂୟସ୍ତ୍ୱତ୍କୁଚକୁମ୍ଭନିର୍ଭରପରୀରମ୍ଭାମୃତଂ ବାଞ୍ଛତି ॥ ୩୫॥
॥ ଗୀତମ୍ ୧୧ ॥
(ଅଥ ଏକାଦଶପ୍ରବନ୍ଧଃ କେଦାରରାଗେଣ ଏକତାଲୀତାଲେ ଗୀୟତେ)
ରତିସୁଖସାରେ ଗତମଭିସାରେ ମଦନମନୋହରବେଶମ୍ ।
ନ କୁରୁ ନିତମ୍ବିନି ଗମନବିଲମ୍ବନମନୁସର ତଂ ହୃଦୟେଶମ୍ ॥
ଧୀରସମୀରେ ଯମୁନାତୀରେ ବସତି ବନେ ବନମାଲୀ
ଗୋପୀପୀନପୟୋଧରମର୍ଦନଚଞ୍ଚଲକରୟୁଗଶାଲୀ ॥ ୧॥
ନାମ ସମେତଂ କୃତସଙ୍କେତଂ ବାଦୟତେ ମୃଦୁବେଣୁମ୍ ।
ବହୁ ମନୁତେ ନନୁ ତେ ତନୁସଙ୍ଗତପବନଚଲିତମପି ରେଣୁମ୍ ॥ ୨॥ ଧୀରସମୀରେ var - ତନୁ
ପତତି ପତତ୍ରେ ବିଚଲତି ପତ୍ରେ ଶଙ୍କିତଭବଦୁପୟାନମ୍ ।
ରଚୟତି ଶୟନଂ ସଚକିତନୟନଂ ପଶ୍ୟତି ତବ ପନ୍ଥାନମ୍ ॥ ୩॥ ଧୀରସମୀରେ
ମୁଖରମଧୀରଂ ତ୍ୟଜ ମଞ୍ଜୀରଂ ରିପୁମିବ କେଲିସୁଲୋଲମ୍ ।
ଚଲ ସଖି କୁଞ୍ଜଂ ସତିମିରପୁଞ୍ଜଂ ଶୀଲୟ ନୀଲନିଚୋଲମ୍ ॥ ୪॥ ଧୀରସମୀରେ
ଉରସି ମୁରାରେରୁପହିତହାରେ ଘନ ଇବ ତରଲବଲାକେ ।
ତଡିଦିବ ପୀତେ ରତିବିପରୀତେ ରାଜସି ସୁକୃତବିପାକେ ॥ ୫॥ ଧୀରସମୀରେ
ବିଗଲିତବସନଂ ପରିହୃତରସନଂ ଘଟୟ ଜଘନମପିଧାନମ୍ ।
କିସଲୟଶୟନେ ପଙ୍କଜନୟନେ ନିଧିମିବ ହର୍ଷନିଦାନମ୍ ॥ ୬॥ ଧୀରସମୀରେ
ହରିରଭିମାନୀ ରଜନିରିଦାନୀମିୟମପି ଯାତି ବିରାମମ୍ ।
କୁରୁ ମମ ବଚନଂ ସତ୍ୱରରଚନଂ ପୂରୟ ମଧୁରିପୁକାମମ୍ ॥ ୭॥ ଧୀରସମୀରେ
ଶ୍ରୀଜୟଦେବେ କୃତହରିସେବେ ଭଣତି ପରମରମଣୀୟମ୍ ।
ପ୍ରମୁଦିତହୃଦୟଂ ହରିମତିସଦୟଂ ନମତ ସୁକୃତକମନୀୟମ୍ ॥ ୮॥ ଧୀରସମୀରେ
ଶ୍ଲୋକଃ ॥ ବିକିରତି ମୁହୁଃ ଶ୍ୱାସାନାଶାଃ ପୁରୋ ମୁହୁରୀକ୍ଷତେ
ପ୍ରବିଶତି ମୁହୁଃ କୁଞ୍ଜଂ ଗୁଞ୍ଜନ୍ମୁହୁର୍ବହୁ ତାମ୍ୟତି ।
ରଚୟତି ମୁହୁଃ ଶୟ୍ୟାଂ ପର୍ୟାକୁଲଂ ମୁହୁରୀକ୍ଷତେ
ମଦନକଦନକ୍ଲାନ୍ତଃ କାନ୍ତେ ପ୍ରିୟସ୍ତବ ବର୍ତତେ ॥ ୩୬॥
ଶ୍ଲୋକଃ ॥ ତ୍ୱଦ୍ୱାମ୍ୟେନ ସମଂ ସମଗ୍ରମଧୁନା ତିଗ୍ମାଂଶୁରସ୍ତଂ ଗତୋ
ଗୋବିନ୍ଦସ୍ୟ ମନୋରଥେନ ଚ ସମଂ ପ୍ରାପ୍ତଂ ତମଃ ସାନ୍ଦ୍ରତାମ୍ ।
କୋକାନାଂ କରୁଣସ୍ୱନେନ ସଦୃଶୀ ଦୀର୍ଘା ମଦଭ୍ୟର୍ଥନା
ତନ୍ମୁଗ୍ଧେ ବିଫଲଂ ବିଲମ୍ବନମସୌ ରମ୍ୟୋଽଭିସାରକ୍ଷଣଃ ॥ ୩୭॥
ଶ୍ଲୋକଃ ॥ ଆଶ୍ଲେଷାଦନୁ ଚୁମ୍ବନାଦନୁ ନଖୋଲ୍ଲେଖାଦନୁ ସ୍ୱାନ୍ତଜ-
ପ୍ରୋଦ୍ବୋଧାଦନୁ ସମ୍ଭ୍ରମାଦନୁ ରତାରମ୍ଭାଦନୁ ପ୍ରୀତୟୋଃ ।
ଅନ୍ୟାର୍ଥଂ ଗତୟୋର୍ଭ୍ରମାନ୍ମିଲିତୟୋଃ ସମ୍ଭାଷଣୈର୍ଜାନତୋ-
ର୍ଦମ୍ପତ୍ୟୋରିହ କୋ ନ କୋ ନ ତମସି ବ୍ରୀଡାବିମିଶ୍ରୋ ରସଃ ॥ ୩୮॥
ଶ୍ଲୋକଃ ॥ ସଭୟଚକିତଂ ବିନ୍ୟସ୍ୟନ୍ତୀଂ ଦୃଶୌ ତିମିରେ ପଥି
ପ୍ରତିତରୁ ମୁହୁଃ ସ୍ଥିତ୍ୱା ମନ୍ଦଂ ପଦାନି ବିତନ୍ୱତୀମ୍ ।
କଥମପି ରହଃ ପ୍ରାପ୍ତାମଙ୍ଗୈରନଙ୍ଗତରଙ୍ଗିଭିଃ
ସୁମୁଖି ସୁଭଗଃ ପଶ୍ୟନ୍ସ ତ୍ୱାମୁପୈତୁ କୃତାର୍ଥତାମ୍ ॥ ୩୯॥
ଶ୍ଲୋକଃ ॥ ରାଧାମୁଗ୍ଦ୍ଧମୁଖାରବିନ୍ଦମଧୁପସ୍ତ୍ରୈଲୋକ୍ୟମୌଲିସ୍ଥଲୀ
ନେପଥ୍ୟୋଚିତନୀଲରତ୍ନମବନୀଭାରାବତାରକ୍ଷମଃ ।
ସ୍ୱଚ୍ଛନ୍ଦଂ ବ୍ରଜସୁନ୍ଦରୀଜନମନସ୍ତୋଷପ୍ରଦୋଷଶ୍ଚିରଂ
କଂସଧ୍ୱଂସନଧୂମକେତୁରବତୁ ତ୍ୱାଂ ଦେବକୀନନ୍ଦନଃ ॥ ୪୦॥
॥ ଇତି ଶ୍ରୀଗୀତଗୋବିନ୍ଦେଽଭିସାରିକବର୍ଣନେ ସାକାଙ୍କ୍ଷପୁଣ୍ଡରୀକାକ୍ଷୋ ନାମ
ପଞ୍ଚମଃ ସର୍ଗଃ ॥
॥ ଷଷ୍ଠଃ ସର୍ଗଃ ॥
॥ କୁଣ୍ଠବୈକୁଣ୍ଠଃ ॥
ଶ୍ଲୋକଃ ॥ ଅଥ ତାଂ ଗନ୍ତୁମଶକ୍ତାଂ ଚିରମନୁରକ୍ତାଂ ଲତାଗୃହେ ଦୃଷ୍ଟ୍ୱା ।
ତଚ୍ଚରିତଂ ଗୋବିନ୍ଦେ ମନସିଜମନ୍ଦେ ସଖୀ ପ୍ରାହ ॥ ୪୧॥
॥ ଗୀତମ୍ ୧୨ ॥
(ଅଥ ଦ୍ୱାଦଶଃ ପ୍ରବନ୍ଧ୍O ଗୁଣକରୀରାଗେଣ ରୂପକତାଲେ ଗୀୟତେ)
ପଶ୍ୟତି ଦିଶି ଦିଶି ରହସି ଭବନ୍ତମ୍ ।
ତଦଧରମଧୁରମଧୂନି ପିବନ୍ତମ୍ ॥ var - ତ୍ୱଦଧର
ନାଥ ହରେ (ଜୟ ନାଥ ହରେ) ସୀଦତି ରାଧା ବାସଗୃହେ ॥ ୧॥
ତ୍ୱଦଭିସରଣରଭସେନ ବଲନ୍ତୀ ।
ପତତି ପଦାନି କିୟନ୍ତି ଚଲନ୍ତୀ ॥ ୨॥ ନାଥ ହରେ
ବିହିତବିଶଦବିସକିସଲୟବଲୟା ।
ଜୀବତି ପରମିହ ତବ ରତିକଲୟା ॥ ୩॥ ନାଥ ହରେ
ମୁହୁରବଲୋକିତମଣ୍ଡନଲୀଲା ।
ମଧୁରିପୁରହମିତି ଭାବନଶୀଲା ॥ ୪॥ ନାଥ ହରେ
ତ୍ୱରିତମୁପୈତି ନ କଥମଭିସାରମ୍ ।
ହରିରିତି ବଦତି ସଖୀମନୁବାରମ୍ ॥ ୫॥ ନାଥ ହରେ
ଶ୍ଲିଷ୍ୟତି ଚୁମ୍ବତି ଜଲଧରକଲ୍ପମ୍ ।
ହରିରୁପଗତ ଇତି ତିମିରମନଲ୍ପମ୍ ॥ ୬॥ ନାଥ ହରେ
ଭବତି ବିଲମ୍ବିନି ବିଗଲିତଲଜ୍ଜା ।
ବିଲପତି ରୋଦିତି ବାସକସଜ୍ଜା ॥ ୭॥ ନାଥ ହରେ
ଶ୍ରୀଜୟଦେବକବେରିଦମୁଦିତମ୍ ।
ରସିକଜନଂ ତନୁତାମତିମୁଦିତମ୍ ॥ ୮॥ ନାଥ ହରେ
ଶ୍ଲୋକଃ ॥ ବିପୁଲପୁଲକପାଲିଃ ସ୍ଫୀତସୀତ୍କାରମନ୍ତ-
ର୍ଜନିତଜଡିମକାକୁବ୍ୟାକୁଲଂ ବ୍ୟାହରନ୍ତୀ ।
ତବ କିତବ ବିଧାୟାମନ୍ଦକନ୍ଦର୍ପଚିନ୍ତାଂ var - ବିଧତ୍ତେ ମନ୍ଦ
ରସଜଲଧିନିମଗ୍ନା ଧ୍ୟାନଲଗ୍ନା ମୃଗାକ୍ଷୀ ॥ ୪୨॥
ଶ୍ଲୋକଃ ॥ ଅଙ୍ଗେଷ୍ୱାଭରଣଂ କରୋତି ବହୁଶଃ ପତ୍ରେଽପି ସଞ୍ଚାରିଣି
ପ୍ରାପ୍ତଂ ତ୍ୱାଂ ପରିଶଙ୍କତେ ବିତନୁତେ ଶୟ୍ୟାଂ ଚିରଂ ଧ୍ୟାୟତି ।
ଇତ୍ୟାକଲ୍ପବିକଲ୍ପତଲ୍ପରଚନାସଙ୍କଲ୍ପଲୀଲାଶତ-
ବ୍ୟାସକ୍ତାପି ବିନା ତ୍ୱୟା ବରତନୁର୍ନୈଷା ନିଶାଂ ନେଷ୍ୟତି ॥ ୪୩॥
ଶ୍ଲୋକଃ ॥ କିଂ ବିଶ୍ରାମ୍ୟସି କୃଷ୍ଣଭୋଗିଭବନେ ଭାଣ୍ଡୀରଭୂମୀରୁହି
ଭ୍ରାତର୍ୟାହି ନ ଦୃଷ୍ଟିଗୋଚରମିତଃ ସାନନ୍ଦନନ୍ଦାସ୍ପଦମ୍ ।
ରାଧାୟା ବଚନଂ ତଦଧ୍ୱଗମୁଖାନ୍ନନ୍ଦାନ୍ତିକେ ଗୋପତୋ
ଗୋବିନ୍ଦସ୍ୟ ଜୟନ୍ତି ସାୟମତିଥିପ୍ରାଶସ୍ତ୍ୟଗର୍ଭା ଗିରଃ ॥ ୪୪ ॥
॥ ଇତି ଗୀତଗୋବିନ୍ଦେ ବାସକସଜ୍ଜାବର୍ଣନେ କୁଣ୍ଠବୈକୁଣ୍ଠୋ ନାମ ଷଷ୍ଟଃ ସର୍ଗଃ ॥
॥ ସପ୍ତମଃ ସର୍ଗଃ ॥
॥ ନାଗରନାରାୟଣଃ ॥
ଶ୍ଲୋକଃ ॥ ଅତ୍ରାନ୍ତରେ ଚ କୁଲଟାକୁଲବର୍ତ୍ମପାତ-
ସଞ୍ଜାତପାତକ ଇବ ସ୍ଫୁଟଲାଞ୍ଛନଶ୍ରୀଃ ।
ବୃନ୍ଦାବନାନ୍ତରମଦୀପୟଦଂଶୁଜାଲୈ-
ର୍ଦିକ୍ସୁନ୍ଦରୀବଦନଚନ୍ଦନବିନ୍ଦୁରିନ୍ଦୁଃ ॥ ୪୫॥
ଶ୍ଲୋକଃ ॥ ପ୍ରସରତି ଶଶଧରବିମ୍ବେ ବିହିତବିଲମ୍ବେ ଚ ମାଧବେ ବିଧୁରା ।
ବିରଚିତବିବିଧବିଲାପଂ ସା ପରିତାପଂ ଚକାରୋଚ୍ଚୈଃ ॥ ୪୬॥
॥ ଗୀତମ୍ ୧୩ ॥
(ଅଥ ତ୍ରୟୋଦଶଃ ପ୍ରବନ୍ଧୋ ଗୌଡମାଲବରାଗେଣ ପ୍ରତିମଣ୍ଠତାଲେ ଗୀୟତେ)
କଥିତସମୟେଽପି ହରିରହହ ନ ଯୟୌ ବନମ୍ ।
ମମ ବିଫଲମିଦମମଲରୂପମପି ଯୌବନମ୍ ॥
ଯାମି ହେ କମିହ ଶରଣଂ ସଖୀଜନବଚନବଞ୍ଚିତା ॥ ୧॥
ଯଦନୁଗମନାୟ ନିଶି ଗହନମପି ଶୀଲିତମ୍ ।
ତେନ ମମ ହୃଦୟମିଦମସମଶରକୀଲିତମ୍ ॥ ୨॥ ଯାମି ହେ
ମମ ମରଣମେବ ବରମତିବିତଥକେତନା ।
କିମିହ ବିଷହାମି ବିରହାନଲମଚେତନା ॥ ୩॥ ଯାମି ହେ
ମାମହହ ବିଧୁରୟତି ମଧୁରମଧୁୟାମିନୀ ।
କାପି ହରିମନୁଭବତି କୃତସୁକୃତକାମିନୀ ॥ ୪॥ ଯାମି ହେ
ଅହହ କଲୟାମି ବଲୟାଦିମଣୀଭୂଷଣମ୍ ।
ହରିବିରହଦହନବହନେନ ବହୁଦୂଷଣମ୍ ॥ ୫॥ ଯାମି ହେ
କୁସୁମସୁକୁମାରତନୁମତନୁଶରଲୀଲୟା ।
ସ୍ରଗପି ହୃଦି ହନ୍ତି ମାମତିବିଷମଶୀଲୟା ॥ ୬॥ ଯାମି ହେ
ଅହମିହ ନିବସାମି ନ ଗଣିତବନବେତସା ।
ସ୍ମରତି ମଧୁସୂଦନୋ ମାମପି ନ ଚେତସା ॥ ୭॥ ଯାମି ହେ
ହରିଚରଣଶରଣଜୟଦେବକବିଭାରତୀ ।
ବସତୁ ହୃଦି ଯୁବତିରିବ କୋମଲକଲାବତୀ ॥ ୮॥ ଯାମି ହେ
ଶ୍ଲୋକଃ ॥ ତତ୍କିଂ କାମପି କାମିନୀମଭିସୃତଃ କିଂ ବା କଲାକେଲିଭି-
ର୍ବଦ୍ଧୋ ବନ୍ଧୁଭିରନ୍ଧକାରିଣି ବନୋପାନ୍ତେ କିମୁ ଭ୍ରାମ୍ୟତି ।
କାନ୍ତଃ କ୍ଲାନ୍ତମନା ମନାଗପି ପଥି ପ୍ରସ୍ଥାତୁମେବାକ୍ଷମଃ
ସଙ୍କେତୀକୃତମଞ୍ଜୁବଞ୍ଜୁଲଲତାକୁଞ୍ଜେଽପି ଯନ୍ନାଗତଃ ॥ ୪୭॥
ଶ୍ଲୋକଃ ॥ ଅଥାଗତଂ ମାଧବମନ୍ତରେଣ
ସଖୀମିୟଂ ବୀକ୍ଷ୍ୟ ବିଷାଦମୂକାମ୍ ।
ବିଶଙ୍କମନା ରମିତଂ କୟାପି
ଜନାର୍ଦନଂ ଦୃଷ୍ଟବଦେତଦାହ ॥ ୪୮॥
॥ ଗୀତମ୍ ୧୪ ॥
(ଅଥ ଚତୁର୍ଦଶପ୍ରବନ୍ଧୋ ବସନ୍ତରାଗେଣ ଏକତାଲୀତାଲେ ଗୀୟତେ)
ସ୍ମରସମରୋଚିତବିରଚିତବେଶା ।
ଗଲିତକୁସୁମଦରବିଲୁଲିତକେଶା ॥
କାପି ମଧୁରିପୁଣା ବିଲସତି ଯୁବତିରଧିକଗୁଣା ॥ ୧॥
ହରିପରିରମ୍ଭଣବଲିତବିକାରା ।
କୁଚକଲଶୋପରି ତରଲିତହାରା ॥ ୨॥ କାପି ମଧୁରିପୁଣା
ବିଚଲଦଲକଲଲିତାନନଚନ୍ଦ୍ରା ।
ତଦଧରପାନରଭସକୃତତନ୍ଦ୍ରା ॥ ୩॥ କାପି ମଧୁରିପୁଣା
ଚଞ୍ଚଲକୁଣ୍ଡଲଦଲିତକପୋଲା ।
ମୁଖରିତରଶନଜଘନଗତିଲୋଲା ॥ ୪॥ କାପି ମଧୁରିପୁଣା
ଦୟିତବିଲୋକିତଲଜ୍ଜିତହସିତା ।
ବହୁବିଧକୂଜିତରତିରସରସିତା ॥ ୫॥ କାପି ମଧୁରିପୁଣା
ବିପୁଲପୁଲକପୃଥୁବେପଥୁଭଙ୍ଗା ।
ଶ୍ୱସିତନିମୀଲିତବିକସଦନଙ୍ଗା ॥ ୬॥ କାପି ମଧୁରିପୁଣା
ଶ୍ରମଜଲକଣଭରସୁଭଗଶରୀରା ।
ପରିପତିତୋରସି ରତିରଣଧୀରା ॥ ୭॥ କାପି ମଧୁରିପୁଣା
ଶ୍ରୀଜୟଦେବଭଣିତହରିରମିତମ୍ ।
କଲିକଲୁଷଂ ଜନୟତୁ ପରିଶମିତମ୍ ॥ ୮॥ କାପି ମଧୁରିପୁଣା
ଶ୍ଲୋକଃ ॥ ବିରହପାଣ୍ଡୁମୁରାରିମୁଖାମ୍ବୁଜ-
ଦ୍ୟୁତିରିୟଂ ତିରୟନ୍ନପି ବେଦନାମ୍ । var ଚେତନାମ୍
ବିଧୁରତୀବ ତନୋତି ମନୋଭୁବଃ
ସୁହୃଦୟେ ହୃଦୟେ ମଦନବ୍ୟଥାମ୍ ॥ ୪୯॥
॥ ଗୀତମ୍ ୧୫ ॥
(ଅଥ ପଞ୍ଚ୍ଦଶପ୍ରବନ୍ଧୋ ଗୁର୍ଜରୀରାଗେଣ ଏକତାଲୀତାଲେ ଗୀୟତେ)
ସମୁଦିତମଦନେ ରମଣୀବଦନେ ଚୁମ୍ବନବଲିତାଧରେ ।
ମୃଗମଦତିଲକଂ ଲିଖତି ସପୁଲକଂ ମୃଗମିବ ରଜନୀକରେ ॥
ରମତେ ଯମୁନାପୁଲିନବନେ ବିଜୟୀ ମୁରାରିରଧୁନା ॥ ୧॥
ଘନଚୟରୁଚିରେ ରଚୟତି ଚିକୁରେ ତରଲିତତରୁଣାନନେ ।
କୁରବକକୁସୁମଂ ଚପଲାସୁଷମଂ ରତିପତିମୃଗକାନନେ ॥ ୨॥ ରମତେ
ଘଟୟତି ସୁଘନେ କୁଚୟୁଗଗଗନେ ମୃଗମଦରୁଚିରୂଷିତେ ।
ମଣିସରମମଲଂ ତାରକପଟଲଂ ନଖପଦଶଶିଭୂଷିତେ ॥ ୩॥ ରମତେ
ଜିତବିସଶକଲେ ମୃଦୁଭୁଜୟୁଗଲେ କରତଲନଲିନୀଦଲେ ।
ମରକତବଲୟଂ ମଧୁକରନିଚୟଂ ବିତରତି ହିମଶୀତଲେ ॥ ୪॥ ରମତେ
ରତିଗୃହଜଘନେ ବିପୁଲାପଘନେ ମନସିଜକନକାସନେ ।
ମଣିମୟରସନଂ ତୋରଣହସନଂ ବିକିରତି କୃତବାସନେ ॥ ୫॥ ରମତେ
ଚରଣକିସଲୟେ କମଲାନିଲୟେ ନଖମଣିଗଣପୂଜିତେ ।
ବହିରପବରଣଂ ଯାବକଭରଣଂ ଜନୟତି ହୃଦି ଯୋଜିତେ ॥ ୬॥ ରମତେ
ରମୟତି ସୁଦୃଶଂ କାମପି ସୁଭୃଶଂ ଖଲହଲଧରସୋଦରେ ।
କିମଫଲମବସଂ ଚିରମିହ ବିରସଂ ବଦ ସଖି ବିଟପୋଦରେ ॥ ୭॥ ରମତେ
ଇହ ରସଭଣନେ କୃତହରିଗୁଣନେ ମଧୁରିପୁପଦସେବକେ ।
କଲିୟୁଗଚରିତଂ ନ ବସତୁ ଦୁରିତଂ କବିନୃପଜୟଦେବକେ ॥ ୮॥ ରମତେ
ଶ୍ଲୋକଃ ॥ ନାୟାତଃ ସଖି ନିର୍ଦୟୋ ଯଦି ଶଠସ୍ତ୍ୱଂ ଦୂତି କିଂ ଦୂୟସେ
ସ୍ୱଚ୍ଛନ୍ଦଂ ବହୁବଲ୍ଲଭଃ ସ ରମତେ କିଂ ତତ୍ର ତେ ଦୂଷଣମ୍ ।
ପଶ୍ୟାଦ୍ୟ ପ୍ରିୟସଙ୍ଗମାୟ ଦୟିତସ୍ୟାକୃଷ୍ୟମାଣଂ ଗୁଣୈ-
ରୁତ୍କଣ୍ଠାର୍ତିଭରାଦିବ ସ୍ଫୁଟଦିଦଂ ଚେତଃ ସ୍ୱୟଂ ଯାସ୍ୟତି ॥ ୫୦॥
॥ ଗୀତମ୍ ୧୬ ॥
(ଅଥ ଷୋଡଶପ୍ରବନ୍ଦୋ ଦେଶାଙ୍କରାଗେଣ ରୂପକତାଲେ ଗୀୟତେ)
ଅନିଲତରଲକୁବଲୟନୟନେନ ।
ତପତି ନ ସା କିସଲୟଶୟନେନ ॥
ସଖି ଯା ରମିତା ବନମାଲିନା ॥ ୧॥
ବିକସିତସରସିଜଲଲିତମୁଖେନ ।
ସ୍ଫୁଟତି ନ ସା ମନସିଜବିଶିଖେନ ॥ ୨॥ ସଖି ଯା
ଅମୃତମଧୁରମୃଦୁତରବଚନେନ ।
ଜ୍ୱଲତି ନ ସା ମଲୟଜପବନେନ ॥ ୩॥ ସଖି ଯା
ସ୍ଥଲଜଲରୁହରୁଚିକରଚରଣେନ ।
ଲୁଠତି ନ ସା ହିମକରକିରଣେନ ॥ ୪॥ ସଖି ଯା
ସଜଲଜଲଦସମୁଦୟରୁଚିରେଣ ।
ଦଲତି ନ ସା ହୃଦି ବିହରଭରେଣ ॥ ୫॥ ସଖି ଯା var - ଚିରବିରହେଣ
କନକନିକଷରୁଚିଶୁଚିବସନେନ ।
ଶ୍ୱସିତି ନ ସା ପରିଜନହସନେନ ॥ ୬॥ ସଖି ଯା
ସକଲଭୁବନଜନବରତରୁଣେନ ।
ବହତି ନ ସା ରୁଜମତିକରୁଣେନ ॥ ୭॥ ସଖି ଯା
ଶ୍ରୀଜୟଦେବଭଣିତବଚନେନ ।
ପ୍ରବିଶତୁ ହରିରପି ହୃଦୟମନେନ ॥ ୮॥ ସଖି ଯା
ଶ୍ଲୋକଃ ॥ ମନୋଭବାନନ୍ଦନ ଚନ୍ଦନାନିଲ
ପ୍ରସୀଦ ରେ ଦକ୍ଷିଣ ମୁଞ୍ଚ ବାମତାମ୍ ।
କ୍ଷଣଂ ଜଗତ୍ପ୍ରାଣ ବିଧାୟ ମାଧବଂ
ପୁରୋ ମମ ପ୍ରାଣହରୋ ଭବିଷ୍ୟସି ॥ ୫୧॥
ଶ୍ଲୋକଃ ॥ ରିପୁରିବ ସଖୀସଂବାସୋଽୟଂ ଶିଖୀବ ହିମାନିଲୋ
ବିଷମିବ ସୁଧାରଶ୍ମିର୍ୟସ୍ମିନ୍ଦୁନୋତି ମନୋଗତେ ।
ହୃଦୟମଦୟେ ତସ୍ମିନ୍ନେବଂ ପୁନର୍ୱଲତେ ବଲାତ୍
କୁବଲୟଦୃଶାଂ ବାମଃ କାମୋ ନିକାମନିରଙ୍କୁଶଃ ॥ ୫୨॥
ଶ୍ଲୋକଃ ॥ ବାଧାଂ ବିଧେହି ମଲୟାନିଲ ପଞ୍ଚବାଣ
ପ୍ରାଣାନ୍ଗୃହାଣ ନ ଗୃହଂ ପୁନରାଶ୍ରୟିଷ୍ୟେ ।
କିଂ ତେ କୃତାନ୍ତଭଗିନି କ୍ଷମୟା ତରଙ୍ଗୈ-
ରଙ୍ଗାନି ସିଞ୍ଚ ମମ ଶାମ୍ୟତୁ ଦେହଦାହଃ ॥ ୫୩॥
ଶ୍ଲୋକଃ ॥ ପ୍ରାତର୍ନୀଲନିଚୋଲମଚ୍ୟୁତମୁରସ୍ସଂବୀତପୀତାମ୍ବରଂ
ରାଧାୟାଶ୍ଚକିତଂ ବିଲୋକ୍ୟ ହସତି ସ୍ୱୈରଂ ସଖୀମଣ୍ଡଲେ ।
ବ୍ରୀଲାଚଞ୍ଚଲମଞ୍ଚଲଂ ନୟନୟୋରାଧାୟ ରାଧାନନେ
ଗୂଢଂ ସ୍ମେରମୁଖୋଽୟମସ୍ତୁ ଜଗଦାନନ୍ଦାୟ ନନ୍ଦାତ୍ମଜଃ ॥ ୫୪॥
॥ ଇତି ଗୀତଗୋବିନ୍ଦେ ବିପ୍ରଲବ୍ଧାବର୍ଣନେ ନାଗନାରାୟଣୋ ନାମ ସପ୍ତମଃ ସର୍ଗଃ ॥
॥ ଅଷ୍ଟମଃ ସର୍ଗଃ ॥
॥ ବିଲକ୍ଷ୍ୟଲକ୍ଷ୍ମୀପତିଃ ॥
ଶ୍ଲୋକଃ ॥ ଅଥ କଥମପି ଯାମିନୀଂ ବିନୀୟ
ସ୍ମରଶରଜର୍ଜରିତାପି ସା ପ୍ରଭାତେ ।
ଅନୁନୟବଚନଂ ବଦନ୍ତମଗ୍ରେ
ପ୍ରଣତମପି ପ୍ରିୟମାହ ସାଭ୍ୟସୂୟମ୍ ॥ ୫୫॥
॥ ଗୀତମ୍ ୧୭ ॥
(ଅଥ ସପ୍ତଦଶପ୍ରବନ୍ଧୋ ଭୈର୍ୱରାଗେଣ ଯତିତାଲେ ଗୀୟତେ)
ରଜନିଜନିତଗୁରୁଜାଗରରାଗକଷାୟିତମଲସନିବେଶମ୍ ।
ବହତି ନୟନମନୁରାଗମିବ ସ୍ଫୁଟମୁଦିତରସାଭିନିବେଶମ୍ ॥
ହରିହରି ଯାହି ମାଧବ ଯାହି କେଶବ ମା ବଦ କୈତବବାଦଂ
ତାମନୁସର ସରସୀରୁହଲୋଚନ ଯା ତବ ହରତି ବିଷାଦମ୍ ॥ ୧॥
କଜ୍ଜଲମଲିନବିଲୋଚନଚୁମ୍ବନବିରଚିତନୀଲିମରୂପମ୍ ।
ଦଶନବସନମରୁଣଂ ତବ କୃଷ୍ଣ ତନୋତି ତନୋରନୁରୂପମ୍ ॥ ୨॥ ଯାହି ମାଧବ
ବପୁରନୁହରତି ତବ ସ୍ମରସଙ୍ଗରଖରନଖରକ୍ଷତରେଖମ୍ ।
ମରକତଶକଲକଲିତକଲଧୌତଲିପିରେବ ରତିଜୟଲେଖମ୍ ॥ ୩॥ ଯାହି ମାଧବ
ଚରଣକମଲଗଲଦଲକ୍ତକସିକ୍ତମିଦଂ ତବ ହୃଦୟମୁଦାରମ୍ ।
ଦର୍ଶୟତୀବ ବହିର୍ମଦନଦ୍ରୁମନବକିସଲୟପରିବାରମ୍ ॥ ୪॥ ଯାହି ମାଧବ
ଦଶନପଦଂ ଭବଦଧରଗତଂ ମମ ଜନୟତି ଚେତସି ଖେଦମ୍ ।
କଥୟତି କଥମଧୁନାପି ମୟା ସହ ତବ ବପୁରେତଦଭେଦମ୍ ॥ ୫॥ ଯାହି ମାଧବ
ବହିରିବ ମଲିନତରଂ ତବ କୃଷ୍ଣ ମନୋଽପି ଭବିଷ୍ୟତି ନୂନମ୍ ।
କଥମଥ ବଞ୍ଚୟସେ ଜନମନୁଗତମସମଶରଜ୍ୱରଦୂନମ୍ ॥ ୬॥ ଯାହି ମାଧବ
ଭ୍ରମତି ଭବାନବଲାକବଲାୟ ବନେଷୁ କିମତ୍ର ବିଚିତ୍ରମ୍ ।
ପ୍ରଥୟତି ପୂତନିକୈବ ବଧୂବଧନିର୍ଦୟବାଲଚରିତ୍ରମ୍ ॥ ୭॥ ଯାହି ମାଧବ
ଶ୍ରୀଜୟଦେବଭଣିତରତିବଞ୍ଚିତଖଣ୍ଡିତୟୁବତିବିଲାପମ୍ ।
ଶୃଣୁତ ସୁଧାମଧୁରଂ ବିବୁଧା ବିବୁଧାଲୟତୋଽପି ଦୁରାପମ୍ ॥ ୮॥ ଯାହି ମାଧବ
ଶ୍ଲୋକଃ ॥ ତଦେବଂ ପଶ୍ୟନ୍ତ୍ୟାଃ ପ୍ରସରଦନୁରାଗଂ ବହିରିବ (ତବେଦଂ)
ପ୍ରିୟାପାଦାଲକ୍ତଚ୍ଛୁରିତମରୁଣଚ୍ଛାୟହୃଦୟମ୍ ।
ମମାଦ୍ୟ ପ୍ରଖ୍ୟାତପ୍ରଣୟଭରଭଙ୍ଗେନ କିତବ
ତ୍ୱଦାଲୋକଃ ଶୋକାଦପି କିମପି ଲଜ୍ଜାଂ ଜନୟତି ॥ ୫୬॥
ଶ୍ଲୋକଃ ॥ ଅନ୍ତର୍ମୋହନମୌଲିଘୂର୍ଣନଚଲନ୍ମନ୍ଦାରବିସ୍ରଂସନଃ
ସ୍ତବ୍ଧାକର୍ଷଣଲୋଚନୋତ୍ସବମହାମନ୍ତ୍ରଃ କୁରଙ୍ଗୀଦୃଶାମ୍ ।
ଦୃପ୍ୟଦ୍ଦାନବଦୂୟମାନଦିବିଷଦ୍ଦୂର୍ୱାରଦୁର୍ୱେଦନା-
ଦ୍ଧ୍ୱଂସଃ କଂସରିପୋଃ ପ୍ରରୋପୟତୁ ବଃ ଶ୍ରେୟାଂସି ବଂଶୀରବଃ ॥ ୫୭॥
ଇତି ଗୀତଗୋବିନ୍ଦେ ଖଣ୍ଡିତାବର୍ଣନେ ବିଲକ୍ଷ୍ୟଲକ୍ଷ୍ମୀପତିର୍ନାମ ଅଷ୍ଠମଃ ସର୍ଗଃ ॥
॥ ନବମଃ ସର୍ଗଃ ॥
॥ ମନ୍ଦମୁକୁନ୍ଦଃ ॥
ତାମଥ ମନ୍ମଥଖିନ୍ନାଂ
ରତିରସଭିନ୍ନାଂ ବିଷାଦସମ୍ପନ୍ନାମ୍ ।
ଗୀତିଃ ॥ ଅଥ ତାଂ ମନ୍ମଥଖିନ୍ନାଂ ରତିରସଭିନ୍ନାଂ ବିବାଦସମ୍ପନ୍ନାଂ
ଅନୁଚିନ୍ତିତହରିଚରିତାଂ
କଲହାନ୍ତରିତାମୁବାଚ ସଖୀ ॥ ୫୮॥
॥ ଗୀତମ୍ ୧୮ ॥
(ଅଥ ଅଷ୍ଟାଦଶପ୍ରବନ୍ଧୋ ଗୁର୍ଜରୀରାଗେଣ ଯତିତାଲେ ଗୀୟତେ)
ହରିରଭିସରତି ବହତି ମଧୁପବନେ ।
କିମପରମଧିକସୁଖଂ ସଖି ଭୁବନେ ॥
ମାଧବେ ମା କୁରୁ ମାନିନି ମାନମୟେ ॥ ୧॥
ତାଲଫଲାଦପି ଗୁରୁମତିସରସମ୍ ।
କିଂ ବିଫଲୀକୁରୁଷେ କୁଚକଲଶମ୍ ॥ ୨॥ ମାଧବେ
କତି ନ କଥିତମିଦମନୁପଦମଚିରମ୍ ।
ମା ପରିହର ହରିମତିଶୟରୁଚିରମ୍ ॥ ୩॥ ମାଧବେ
କିମିତି ବିଷୀଦସି ରୋଦିଷି ବିକଲା ।
ବିହସତି ଯୁବତିସଭା ତବ ସକଲା ॥ ୪॥ ମାଧବେ
ମୃଦୁନଲିନୀଦଲଶୀତଲଶୟନେ ।
ହରିମବଲୋକୟ ସଫଲୟ ନୟନେ ॥ ୫॥ ମାଧବେ
ଜନୟସି ମନସି କିମିତି ଗୁରୁଖେଦମ୍ ।
ଶୃଣୁ ମମ ବଚନମନୀହିତଭେଦମ୍ ॥ ୬॥ ମାଧବେ
ହରିରୁପୟାତୁ ବଦତୁ ବହୁମଧୁରମ୍ ।
କିମିତି କରୋଷି ହୃଦୟମତିବିଧୁରମ୍ ॥ ୭॥ ମାଧବେ
ଶ୍ରୀଜୟଦେବଭଣିତମତିଲଲିତମ୍ ।
ସୁଖୟତୁ ରସିକଜନଂ ହରିଚରିତମ୍ ॥ ୮॥ ମାଧବେ
ଶ୍ଲୋକଃ ॥ ସ୍ନିଗ୍ଧେ ଯତ୍ପରୁଷାସି ଯତ୍ପ୍ରଣମତି ସ୍ତବ୍ଧାସି ଯଦ୍ରାଗିଣି
ଦ୍ୱେଷସ୍ଥାସି ଯଦୁନ୍ମୁଖେ ବିମୁଖତାଂ ଯାତାସି ତସ୍ମିନ୍ପ୍ରିୟେ ।
ତଦ୍ୟୁକ୍ତଂ ବିପରୀତକାରିଣି ତବ ଶ୍ରୀଖଣ୍ଡଚର୍ଚା ବିଷଂ var - ଯୁକ୍ତଂ ତଦ୍
ଶୀତାଂଶୁସ୍ତପନୋ ହିମଂ ହୁତବହଃ କ୍ରୀଡାମୁଦୋ ଯାତନାଃ ॥ ୫୯॥
ଶ୍ଲୋକଃ ॥ ସାନ୍ଦ୍ରାନନ୍ଦପୁରନ୍ଦରାଦିଦିବିଷଦ୍ୱୃନ୍ଦୈରମନ୍ଦାଦରା-
ଦାନମ୍ରୈର୍ମକୁଟେନ୍ଦ୍ରନୀଲମଣିଭିଃ ସନ୍ଦର୍ଶିତେନ୍ଦିନ୍ଦିରମ୍ ।
ସ୍ୱଚ୍ଛନ୍ଦଂ ମକରନ୍ଦସୁନ୍ଦରଗଲନ୍ମନ୍ଦାକିନୀମେଦୁରଂ
ଶ୍ରୀଗୋବିନ୍ଦପଦାରବିନ୍ଦମଶୁଭସ୍କନ୍ଦାୟ ବନ୍ଦାମହେ ॥ ୬୦॥
॥ ଇତି ଗୀତଗୋବିନ୍ଦେ କଲହାନ୍ତରିତାବର୍ଣନେ ମନ୍ଦମୁକୁନ୍ଦୋ ନାମ ନବମଃ ସର୍ଗଃ ॥
॥ ଦଶମଃ ସର୍ଗଃ ॥
॥ ଚତୁରଚତୁର୍ଭୁଜଃ ॥
ଶ୍ଲୋକଃ ॥ ଅତ୍ରାନ୍ତରେ ମସୃଣରୋଷବଶାମସୀମ-
ନିଃଶ୍ୱାସନିଃସହମୁଖୀଂ ସୁମୁଖୀମୁପେତ୍ୟ । var - ସମୁପେତ୍ୟ ରାଧାଂ
ସବ୍ରୀଡମୀକ୍ଷିତସଖୀବଦନାଂ ଦିନାନ୍ତେ
ସାନନ୍ଦଗଦ୍ଗଦପଦଂ ହରିରିତ୍ୟୁବାଚ ॥ ୬୧॥ var - ବିଦଂ
॥ ଗୀତମ୍ ୧୯ ॥
(ଅଥ ଏକୋନବିଂଶଃ ପ୍ରବନ୍ଧୋ ଦେଶବରାଡୀରାଗେଣ ଆଡ୍ୱତାଲେ ଗୀୟତେ)
ବଦସି ଯଦି କିଞ୍ଚିଦପି ଦନ୍ତରୁଚିକୌମୁଦୀ
ହରତି ଦରତିମିରମତିଘୋରମ୍ ।
ସ୍ଫୁରଦଧରସୀଧବେ ତବ ବଦନଚନ୍ଦ୍ରମା
ରୋଚୟତି ଲୋଚନଚକୋରମ୍ ॥
ପ୍ରିୟେ ଚାରୁଶୀଲେ ମୁଞ୍ଚ ମୟି ମାନମନିଦାନଂ
ସପଦି ମଦନାନଲୋ ଦହତି ମମ ମାନସଂ
ଦେହି ମୁଖକମଲମଧୁପାନମ୍ ॥ ୧॥
ସତ୍ୟମେବାସି ଯଦି ସୁଦତି ମୟି କୋପିନୀ
ଦେହି ଖରନଖରଶରଘାତମ୍ ।
ଘଟୟ ଭୁଜବନ୍ଧନଂ ଜନୟ ରଦଖଣ୍ଡନଂ
ଯେନ ବା ଭବତି ସୁଖଜାତମ୍ ॥ ୨॥ ପ୍ରିୟେ ଚାରୁଶୀଲେ
ତ୍ୱମସି ମମ ଭୂଷଣଂ ତ୍ୱମସି ମମ ଜୀବନଂ
ତ୍ୱମସି ମମ ଭବଜଲଧିରତ୍ନମ୍ ।
ଭବତୁ ଭବତୀହ ମୟି ସତତମନୁରୋଧିନୀ
ତତ୍ର ମମ ହୃଦୟମତିୟତ୍ନମ୍ ॥ ୩॥ ପ୍ରିୟେ ଚାରୁଶୀଲେ
ନୀଲନଲିନାଭମପି ତନ୍ୱି ତବ ଲୋଚନଂ
ଧାରୟତି କୋକନଦରୂପମ୍ ।
କୁସୁମଶରବାଣଭାବେନ ଯଦି ରଞ୍ଜୟସି
କୃଷ୍ଣମିଦମେତଦନୁରୂପମ୍ ॥ ୪॥ ପ୍ରିୟେ ଚାରୁଶୀଲେ
ସ୍ଫୁରତୁ କୁଚକୁମ୍ଭୟୋରୁପରି ମଣିମଞ୍ଜରୀ
ରଞ୍ଜୟତୁ ତବ ହୃଦୟଦେଶମ୍ ।
ରସତୁ ରଶନାପି ତବ ଘନଜଘନମଣ୍ଡଲେ
ଘୋଷୟତୁ ମନ୍ମଥନିଦେଶମ୍ ॥ ୫॥ ପ୍ରିୟେ ଚାରୁଶୀଲେ
ସ୍ଥଲକମଲଗଞ୍ଜନଂ ମମ ହୃଦୟରଞ୍ଜନଂ
ଜନିତରତିରଙ୍ଗପରଭାଗମ୍ ।
ଭଣ ମସୃଣବାଣି କରବାଣି ପଦପଙ୍କଜଂ var - ଚରଣଦ୍ୱୟଂ
ସରସଲସଦଲକ୍ତକରାଗମ୍ ॥ ୬॥ ପ୍ରିୟେ ଚାରୁଶୀଲେ
ସ୍ମରଗରଲଖଣ୍ଡନଂ ମମ ଶିରସି ମଣ୍ଡନଂ
ଦେହି ପଦପଲ୍ଲବମୁଦାରମ୍ ।
ଜ୍ୱଲତି ମୟି ଦାରୁଣୋ ମଦନକଦନାରୁଣୋ var - ନାନଲୋ
ହରତୁ ତଦୁପାହିତବିକାରମ୍ ॥ ୭॥ ପ୍ରିୟେ ଚାରୁଶୀଲେ
ଇତି ଚଟୁଲଚାଟୁପଟୁଚାରୁ ମୁରବୈରିଣୋ
ରାଧିକାମଧି ବଚନଜାତମ୍ ।
ଜୟତି ପଦ୍ମାବତୀରମଣଜୟଦେବକବି-
ଭାରତୀଭଣିତମିତିଗୀତମ୍ ॥ ୮॥ ପ୍ରିୟେ ଚାରୁଶୀଲେ
ଶ୍ଲୋକଃ ॥ ପରିହର କୃତାତଙ୍କେ ଶଙ୍କାଂ ତ୍ୱୟା ସତତଂ ଘନ-
ସ୍ତନଜଘନୟାକ୍ରାନ୍ତେ ସ୍ୱାନ୍ତେ ପରାନବକାଶିନି ।
ବିଶତି ବିତନୋରନ୍ୟୋ ଧନ୍ୟୋ ନ କୋଽପି ମମାନ୍ତରଂ
ସ୍ତନଭରପରୀରମ୍ଭାରମ୍ଭେ ବିଧେହି ବିଧେୟତାମ୍ ॥ ୬୨॥
ଶ୍ଲୋକଃ ॥ ମୁଗ୍ଧେ ବିଧେହି ମୟି ନିର୍ଦୟଦନ୍ତଦଂଶ-
ଦୋର୍ୱଲ୍ଲିବନ୍ଧନିବିଡସ୍ତନପୀଡନାନି ।
ଚଣ୍ଡି ତ୍ୱମେବ ମୁଦମଞ୍ଚ ନ ପଞ୍ଚବାଣ-
ଚଣ୍ଡାଲକାଣ୍ଡଦଲନାଦସବଃ ପ୍ରୟାନ୍ତୁ ॥ ୬୩॥
ଶ୍ଲୋକଃ ॥ ବ୍ୟଥୟତି ବୃଥା ମୌନଂ ତନ୍ୱି ପ୍ରପଞ୍ଚୟ ପଞ୍ଚମଂ
ତରୁଣି ମଧୁରାଲାପୈସ୍ତାପଂ ବିନୋଦୟ ଦୃଷ୍ଟିଭିଃ ।
ସୁମୁଖି ବିମୁଖୀଭାବଂ ତାବଦ୍ୱିମୁଞ୍ଚ ନ ମୁଞ୍ଚ ମାଂ var - ବଞ୍ଚୟ
ସ୍ୱୟମତିଶୟସ୍ନିଗ୍ଧୋ ମୁଗ୍ଧେ ପ୍ରିୟୋଽହମୁପସ୍ଥିତଃ ॥ ୬୪॥
ଶ୍ଲୋକଃ ॥ ବନ୍ଧୂକଦ୍ୟୁତିବାନ୍ଧବୋଽୟମଧରଃ ସ୍ନିଗ୍ଧା ମଧୂକଚ୍ଛବି-
ର୍ଗଣ୍ଡଶ୍ଚଣ୍ଡି ଚକାସ୍ତି ନୀଲନଲିନଶ୍ରୀମୋଚନଂ ଲୋଚନମ୍ ।
ନାସାଭ୍ୟେତି ତିଲପ୍ରସୂନପଦବୀଂ କୁନ୍ଦାଭଦାନ୍ତି ପ୍ରିୟେ
ପ୍ରାୟସ୍ତ୍ୱନ୍ମୁଖସେବୟା ବିଜୟତେ ବିଶ୍ୱଂ ସ ପୁଷ୍ପାୟୁଧଃ ॥ ୬୫॥
ଶ୍ଲୋକଃ ॥ ଦୃଶୌ ତବ ମଦାଲସେ ବଦନମିନ୍ଦୁସନ୍ଦୀପକଂ var - ମତ୍ୟାନ୍ୱିତଂ
ଗତିର୍ଜନମନୋରମା ବିଧୁତରମ୍ଭମୂରୁଦ୍ୱୟମ୍ ।
ରତିସ୍ତବ କଲାବତୀ ରୁଚିରଚିତ୍ରଲେଖେ ଭ୍ରୁବା-
ବହୋ ବିବୁଧୟୌବନଂ ବହସି ତନ୍ୱୀ ପୃଥ୍ୱୀଗତା ॥ ୬୬॥
ଶ୍ଲୋକଃ ॥ ଶଶିମୁଖି ତବ ଭାତି ଭଙ୍ଗୁରଭ୍ରୂର୍ୟୁବଜନମୋହନକରାଲକାଲସର୍ପୀ ।
ତଦୁଦିତବିଷଭେଷଜଂ ତ୍ୱିହୈକା ତ୍ୱଦଧରଶୀଥୁସୁଧୈବ ଭାଗ୍ୟଭୋଗ୍ୟା ॥ ୬୭॥
ଶ୍ଲୋକଃ ॥ ପ୍ରୀତିଂ ବସ୍ତନୁତାଂ ହରିଃ କୁବଲୟାପୀଡେନ ସାର୍ଧଂ ରଣେ var - ସା ପ୍ରୀତିଂ ତନୁତାଂ
ରାଧାପୀନପୟୋଧରସ୍ମରଣକୃତ୍କୁମ୍ଭେନ ସମ୍ଭେଦବାନ୍ ।
ଯତ୍ର ସ୍ୱିଦ୍ୟତି ମୀଲତି କ୍ଷଣମଭୂତ୍କ୍ଷିପ୍ତଦ୍ୱିପେଽପି କ୍ଷଣାତ୍
କଂସସ୍ୟାଥ ବଲେ ଜିତଂ ଜିତମିତି ବ୍ୟାମୋହକୋଲାହଲଃ ॥ ୬୮॥
var -: last 2 lines
ପତ୍ରେ ବିଭ୍ୟତି ମୀଲତି କ୍ଷଣମପି କ୍ଷିପ୍ରଂ ତଦାଲୋକନାଦ୍-
ବ୍ୟାମୋହେନ ଜିତଂ ଜିତଂ ଜିତମିତି ବ୍ୟାଲୋଲକୋଲାହଲଃ ॥
॥ ଇତି ଶ୍ରୀଗୀତଗୋବିନ୍ଦେ ମାନିନୀବର୍ଣନେ ଚତୁରଚତୁର୍ଭୁଜୋ ନାମ ଦଶମଃ ସର୍ଗଃ ॥
॥ ଏକାଦଶଃ ସର୍ଗଃ ॥
॥ ସାନନ୍ଦଦାମୋଦରଃ ॥
ସୁଚିରମନୁନୟେନ ପ୍ରୀଣୟିତ୍ୱା ମୃଗାକ୍ଷୀଂ (ରୁଚିରମନୁନୟେନ)
ଗତବତି କୃତବେଶେ କେଶବେ କୁଞ୍ଜଶୟ୍ୟାମ୍ ।
ରଚିତରୁଚିରଭୂଷାଂ ଦୃଷ୍ଟିମୋଷେ ପ୍ରଦୋଷେ
ସ୍ଫୁରତି ନିରବସାଦାଂ କାପି ରାଧାଂ ଜଗାଦ ॥ ୬୯॥
॥ ଗୀତମ୍ ୨୦ ॥
(ଅଥ ବିଂଶଃ ପ୍ରବନ୍ଧୋ ବସନ୍ତରାଗେଣ ରୂପକତାଲେ ଗୀୟତେ)
ବିରଚିତଚାଟୁବଚନରଚନଂ ଚରଣେ ରଚିତପ୍ରଣିପାତମ୍ ।
var - : ବିରଚିତଚାଟୁବଚନେନ ଚରଣରଚିତପ୍ରଣିପାତମ୍
ସମ୍ପ୍ରତି ମଞ୍ଜୁଲବଞ୍ଜୁଲସୀମନି କେଲିଶୟନମନୁୟାତମ୍ ॥
ମୁଗ୍ଧେ ମଧୁମଥନମନୁଗତମନୁସର ରାଧିକେ ॥ ୧॥
ଘନଜଘନସ୍ତନଭାରଭରେ ଦରମନ୍ଥରଚରଣବିହାରମ୍ ।
ମୁଖରିତମଣୀମଞ୍ଜୀରମୁପୈହି ବିଧେହି ମରାଲବିକାରମ୍ ॥ ୨॥ ମୁଗ୍ଧେ
ଶୃଣୁ ରମଣୀୟତରଂ ତରୁଣୀଜନମୋହନମଧୁରିପୁରାବମ୍ ।
କୁସୁମଶରାସନଶାସନବନ୍ଦିନି ପିକନିକରେ ଭଜ ଭାବମ୍ ॥ ୩॥ ମୁଗ୍ଧେ var - ବନ୍ଦିନି
ଅନିଲତରଲକିସଲୟନିକରେଣ କରେଣ ଲତାନିକୁରମ୍ବମ୍ ।
ପ୍ରେରଣମିବ କରଭୋରୁ କରୋତି ଗତିଂ ପ୍ରତିମୁଞ୍ଚ ବିଲମ୍ବମ୍ ॥ ୪॥ ମୁଗ୍ଧେ
ସ୍ଫୁରିତମନଙ୍ଗତରଙ୍ଗବଶାଦିବ ସୂଚିତହରିପରିରମ୍ଭମ୍ ।
ପୃଚ୍ଛ ମନୋହରହାରବିମଲଜଲଧାରମମୁଂ କୁଚକୁମ୍ଭମ୍ ॥ ୫॥ ମୁଗ୍ଧେ
ଅଧିଗତମଖିଲସଖୀଭିରିଦଂ ତବ ବପୁରପି ରତିରଣସଜ୍ଜମ୍ ।
ଚଣ୍ଡି ରଣିତରଶନାରବଡିଣ୍ଡିମମଭିସର ସରସମଲଜ୍ଜମ୍ ॥ ୬॥ ମୁଗ୍ଧେ
ସ୍ମରଶରସୁଭଗନଖେନ କରେଣ ସଖୀମବଲମ୍ବ୍ୟ ସଲୀଲମ୍ । var - ସଖୀମବଲମ୍ବ୍ୟ କରେଣ
ଚଲ ବଲୟକ୍ୱଣୀତୈରବବୋଧୟ ହରମପି ନିଜଗତିଶୀଲମ୍ ॥ ୭॥ ମୁଗ୍ଧେ
ଶ୍ରୀଜୟଦେବଭଣିତମଧରୀକୃତହାରମୁଦାସିତବାମମ୍ ।
ହରିବିନିହିତମନସାମଧିତିଷ୍ଠତୁ କଣ୍ଠତଟୀମବିରାମମ୍ ॥ ୮॥ ମୁଗ୍ଧେ
ଶ୍ଲୋକଃ ॥ ସା ମାଂ ଦ୍ରକ୍ଷ୍ୟତି ବକ୍ଷ୍ୟତି ସ୍ମରକଥାଂ ପ୍ରତ୍ୟଙ୍ଗମାଲିଙ୍ଗନୈଃ
ପ୍ରୀତିଂ ଯାସ୍ୟତି ରଂସ୍ୟତେ ସଖି ସମାଗତ୍ୟେତି ଚିନ୍ତାକୁଲଃ ।
ସ ତ୍ୱାଂ ପଶ୍ୟତି ବେପତେ ପୁଲକୟତ୍ୟାନନ୍ଦତି ସ୍ୱିଦ୍ୟତି
ପ୍ରତ୍ୟୁଦ୍ଗଚ୍ଛତି ମୂର୍ଚ୍ଛତି ସ୍ଥିରତମଃପୁଞ୍ଜେ ନିକୁଞ୍ଜେ ପ୍ରିୟଃ ॥ ୭୦॥
ଶ୍ଲୋକଃ ॥ ଅକ୍ଷ୍ଣୋର୍ନିକ୍ଷିପଦଞ୍ଜନଂ ଶ୍ରବଣୟୋସ୍ତାପିଚ୍ଛଗୁଚ୍ଛାବଲୀଂ
ମୂର୍ଧ୍ନି ଶ୍ୟାମସରୋଜଦାମ କୁଚୟୋଃ କସ୍ତୂରିକାପତ୍ରକମ୍ ।
ଧୂର୍ତାନାମଭିସାରସତ୍ୱରହୃଦାଂ ବିଷ୍ୱଙ୍ନିକୁଞ୍ଜେ ସଖି
ଧ୍ୱାନ୍ତଂ ନୀଲନିଚୋଲଚାରୁ ସୁଦୃଶାଂ ପ୍ରତ୍ୟଙ୍ଗମାଲିଙ୍ଗତି ॥ ୭୧॥
ଶ୍ଲୋକଃ ॥ କାଶ୍ମୀରଗୌରବପୁଷାମଭିସାରିକାଣାଂ
ଆବଦ୍ଧରେଖମଭିତୋ ରୁଚିମଞ୍ଜରୀଭିଃ ।
ଏତତ୍ତମାଲଦଲନୀଲତମଂ ତମିସ୍ରଂ
ତତ୍ପ୍ରେମହେମନିକଷୋପଲତାଂ ତନୋତି ॥ ୭୨॥
ଶ୍ଲୋକଃ ॥ ହାରାବଲୀତରଲକାଞ୍ଚନକାଞ୍ଚିଦାମ-
କେୟୂରକଙ୍କଣମଣିଦ୍ୟୁତିଦୀପିତସ୍ୟ ।
ଦ୍ୱାରେ ନିକୁଞ୍ଜନିଲୟସ୍ୟ ହରିଂ ନିରୀକ୍ଷ୍ୟ
ବ୍ରୀଡାବତୀମଥ ସଖୀ ନିଜଗାହ ରାଧାମ୍ ॥ ୭୩॥
॥ ଗୀତମ୍ ୨୧ ॥
(ଅଥ ଏକବିଂଶତିତମଃ ପ୍ରବନ୍ଧୋ ବରାଡୀରାଗେଣ ଆଡ୍ୱତାଲେ ଗୀୟତେ)
ମଞ୍ଜୁତରକୁଞ୍ଜତଲକେଲିସଦନେ ।
ବିଲସ ରତିରଭସହସିତବଦନେ ॥
ପ୍ରବିଶ ରାଧେ ମାଧବସମୀପମିହ ॥ ୧॥
ନବଭବଦଶୋକଦଲଶୟନସାରେ ।
ବିଲସ କୁଚକଲଶତରଲହାରେ ॥ ୨॥ ପ୍ରବିଶ
କୁସୁମଚୟରଚିତଶୁଚିବାସଗେହେ ।
ବିଲସ କୁସୁମସୁକୁମାରଦେହେ ॥ ୩॥ ପ୍ରବିଶ
ଚଲମଲୟବନପବନସୁରଭିଶୀତେ । var ମୃଦୁଚଲମଲୟପବନସୁରଭିଶୀତେ
ବିଲସ ରସବଲିତଲଲିତଗୀତେ ॥ ୪॥ ପ୍ରବିଶ
ମଧୁମୁଦିତମଧୁପକୁଲକଲିତରାବେ ।
ବିଲସ ମଦନରସସରସଭାବେ ॥ ୫॥ ପ୍ରବିଶ var - ରଭସ
ମଧୁରତରପିକନିକରନିନଦମୁଖରେ ।
ବିଲସ ଦଶନରୁଚିରୁଚିରଶିଖରେ ॥ ୬॥ ପ୍ରବିଶ
ବିତତବହୁବଲ୍ଲିନବପଲ୍ଲବଘନେ ।
ବିଲସ ଚିରମଲସପୀନଜଘନେ ॥ ୭॥ ପ୍ରବିଶ
ବିହିତପଦ୍ମାବତୀସୁଖସମାଜେ ।
ଭଣତି ଜୟଦେବକବିରାଜେ ।
କୁରୁ ମୁରାରେ ମଙ୍ଗଲଶତାନି ॥ ୮॥ ପ୍ରବିଶ
ଶ୍ଲୋକଃ ॥ ତ୍ୱାଂ ଚିତ୍ତେନ ଚିରଂ ବହନ୍ନୟମତିଶ୍ରାନ୍ତୋ ଭୃଶଂ ତାପିତଃ
କନ୍ଦର୍ପେଣ ତୁ ପାତୁମିଚ୍ଛତି ସୁଧାସମ୍ବାଧବିମ୍ବାଧରମ୍ ।
ଅସ୍ୟାଙ୍ଗଂ ତଦଲଙ୍କୁରୁ କ୍ଷଣମିହ ଭ୍ରୂକ୍ଷେପଲକ୍ଷ୍ମୀଲବ-
କ୍ରୀତେ ଦାସ ଇବୋପସେବିତପଦାମ୍ଭୋଜେ କୁତଃ ସମ୍ଭ୍ରମଃ ॥ ୭୪॥
ଶ୍ଲୋକଃ ॥ ସା ସସାଧ୍ୱସସାନନ୍ଦଂ ଗୋବିନ୍ଦେ ଲୋଲଲୋଚନା ।
ସିଞ୍ଜାନା ମଞ୍ଜୁମଞ୍ଜୀରଂ ପ୍ରବିବେଶ ନିବେଶନମ୍ ॥ ୭୫॥
॥ ଗୀତମ୍ ୨୨ ॥
(ଅଥ ଦ୍ୱାବିଂଶତିତମଃ ପ୍ରବନ୍ଧୋ ବରାଡୀରାଗେଣ ରୂପକତାଲେ ଗୀୟତେ)
ରାଧାବଦନବିଲୋକନବିକସିତବିବିଧବିକାରବିଭଙ୍ଗମ୍ ।
ଜଲନିଧିମିବ ବିଧୁମଣ୍ଡଲଦର୍ଶନତରଲିତତୁଙ୍ଗତରଙ୍ଗମ୍ ॥
ହରିମେକରସଂ ଚିରମଭିଲଷିତବିଲାସଂ
ସା ଦଦାର୍ଶ ଗୁରୁହର୍ଷବଶଂବଦବଦନମନଙ୍ଗନିବାସମ୍ ॥ ୧॥
ହାରମମଲତରତାରମୁରସି ଦଧତଂ ପରିରଭ୍ୟ ବିଦୂରମ୍ ।
ସ୍ଫୁଟତରଫେନକଦମ୍ବକରମ୍ବିତମିବ ଯମୁନାଜଲପୂରମ୍ ॥ ୨॥ ହରିମେକରସଂ
ଶ୍ୟାମଲମୃଦୁଲକଲେବରମଣ୍ଡଲମଧିଗତଗୌରଦୁକୂଲମ୍ ।
ନୀଲନଲିନମିବ ପୀତପରାଗପଟଲଭରବଲୟିତମୂଲମ୍ ॥ ୩॥ ହରିମେକରସଂ
ତରଲଦୃଗଞ୍ଚଲଚଲନମନୋହରବଦନଜନିତରତିରାଗମ୍ ।
ସ୍ଫୁଟକମଲୋଦରଖେଲିତଖଞ୍ଜନୟୁଗମିବ ଶରଦି ତଡାଗମ୍ ॥ ୪॥ ହରିମେକରସଂ
ବଦନକମଲପରିଶୀଲନମିଲିତମିହିରସମକୁଣ୍ଡଲଶୋଭମ୍ ।
ସ୍ମିତରୁଚିରୁଚିରସମୁଲ୍ଲସିତାଧରପଲ୍ଲବକୃତରତିଲୋଭମ୍ ॥ ୫॥ ହରିମେକରସଂ
ଶଶିକିରଣଚ୍ଛୁରିତୋଦରଜଲଧରସୁନ୍ଦରସକୁସୁମକେଶମ୍ ।
ତିମିରୋଦିତବିଧୁମଣ୍ଡଲନିର୍ମଲମଲୟଜତିଲକନିବେଶମ୍ ॥ ୬॥ ହରିମେକରସଂ
ବିପୁଲପୁଲକଭରଦନ୍ତୁରିତଂ ରତିକେଲିକଲାଭିରଧୀରମ୍ ।
ମଣିଗଣକିରଣସମୂହସମୁଜ୍ଜ୍ୱଲଭୂଷଣସୁଭଗଶରୀରମ୍ ॥ ୭॥ ହରିମେକରସଂ
ଶ୍ରୀଜୟଦେବଭଣିତବିଭବଦ୍ୱିଗୁଣୀକୃତଭୂଷଣଭାରମ୍ ।
ପ୍ରଣମତ ହୃଦି ସୁଚିରଂ ବିନିଧାୟ ହରିଂ ସୁକୃତୋଦୟସାରମ୍ ॥ ୮॥ ହରିମେକରସଂ
ଶ୍ଲୋକଃ ॥ var - ହୃଦି ସୁଚିରଂ ବିନିଧାୟ ହରିଂ
ଅତିକ୍ରମ୍ୟାପାଙ୍ଗଂ ଶ୍ରବଣପଥପର୍ୟନ୍ତଗମନ-
ପ୍ରୟାସେନେବାକ୍ଷ୍ଣୋସ୍ତରଲତରତାରଂ ପତିତୟୋଃ ।
ଇଦାନୀଂ ରାଧାୟାଃ ପ୍ରିୟତମସମାଲୋକସମୟେ
ପପାତ ସ୍ୱେଦାମ୍ବୁପ୍ରସର ଇବ ହର୍ଷାଶ୍ରୁନିକରଃ ॥ ୭୬॥
ଶ୍ଲୋକଃ ॥ ଭବନ୍ତ୍ୟାସ୍ତଲ୍ପାନ୍ତଂ କୃତକପଟକଣ୍ଡୂତିପିହିତ- var - ଭଜନ୍ତ୍ୟାସ୍ତଲ୍ପାନ୍ତଂ
ସ୍ମିତଂ ଯାତେ ଗେହାଦ୍ବହିରବହିତାଲୀପରିଜନେ ।
ପ୍ରିୟାସ୍ୟଂ ପଶ୍ୟନ୍ତ୍ୟାଃ ସ୍ମରଶରସମାକୂଲସୁଭଗଂ var - ସ୍ମରପରବଶାକୂତସୁଭଗଂ
ସଲଜ୍ଜା ଲଜ୍ଜାପି ବ୍ୟଗମଦିବ ଦୂରଂ ମୃଗଦୃଶଃ ॥ ୭୭॥
ଶ୍ଲୋକଃ ॥ ଜୟଶ୍ରୀବିନ୍ୟସ୍ତୈର୍ମହିତ ଇବ ମନ୍ଦାରକୁସୁମୈଃ
ସ୍ୱୟଂ ସିନ୍ଦୂରେଣ ଦ୍ୱିପରଣମୁଦା ମୁଦ୍ରିତ ଇବ ।
ଭୁଜାପୀଡକ୍ରୀଡାହତକୁବଲୟାପୀଡକରିଣଃ
ପ୍ରକୀର୍ଣାସୃଗ୍ବିନ୍ଦୁର୍ଜୟତି ଭୁଜଦଣ୍ଡୋ ମୁରଜିତଃ ॥ ୭୮॥
ଶ୍ଲୋକଃ ॥ ସୌନ୍ଦର୍ୟୈକନିଧେରନଙ୍ଗଲଲନାଲାବଣ୍ୟଲୀଲାଜୁଷୋ
ରାଧାୟା ହୃଦି ପଲ୍ୱଲେ ମନସିଜକୀଡୈକରଙ୍ଗସ୍ଥଲେ ।
ରମ୍ୟୋରୋଜସରୋଜଖେଲନରସିତ୍ୱାଦାତ୍ମନଃ ଖ୍ୟାପୟନ୍
ଧ୍ୟାତୁର୍ମାନସରାଜହଂସନିଭତାଂ ଦେୟାନ୍ମୁକୁନ୍ଦୋ ମୁଦମ୍ ॥ ୭୯॥
॥ ଇତି ଶ୍ରୀଗୀତଗୋବିନ୍ଦେ ରାଧିକାମିଲନେ ସାନନ୍ଦଦାମୋଦରୋ ନାମୈକାଦଶଃ ସର୍ଗଃ ॥
॥ ଦ୍ୱାଦଶଃ ସର୍ଗଃ ॥
॥ ସୁପ୍ରୀତପୀତାମ୍ବରଃ ॥
ଶ୍ଲୋକଃ ॥ ଗତବତି ସଖୀବୃନ୍ଦେଽମନ୍ଦତ୍ରପାଭରନିର୍ଭର-
ସ୍ମରପରବଶାକୂତସ୍ଫୀତସ୍ମିତସ୍ନପିତାଧରାମ୍ ।
ସରସମନସଂ ଦୃଷ୍ଟ୍ୱା ରାଧାଂ ମୁହୁର୍ନବପଲ୍ଲବ-
ପ୍ରସବଶୟନେ ନିକ୍ଷିପ୍ତାକ୍ଷୀମୁବାଚ ହରିଃ ପ୍ରିୟାମ୍ ॥ ୮୦॥
॥ ଗୀତମ୍ ୨୩ ॥
(ଅଥ ତ୍ରୟୋବିଂଶତିତମଃ ପ୍ରବନ୍ଧୋ ବିଭାସରାଗେଣ ଏକତାଲୀତାଲେ ଗୀୟତେ)
କିସଲୟଶୟନତଲେ କୁରୁ କାମିନି ଚରଣନଲିନବିନିବେଶମ୍ ।
ତବ ପଦପଲ୍ଲବବୈରିପରାଭବମିଦମନୁଭବତୁ ସୁବେଶମ୍ ॥
କ୍ଷଣମଧୁନା ନାରାୟଣମନୁଗତମନୁସର ରାଧିକେ ॥ ୧॥
କରକମଲେନ କରୋମି ଚରଣମହମାଗମିତାସି ବିଦୂରମ୍ ।
କ୍ଷଣମୁପକୁରୁ ଶୟନୋପରି ମାମିବ ନୂପୁରମନୁଗତିଶୂରମ୍ ॥ ୨॥ କ୍ଷଣମଧୁନା
ବଦନସୁଧାନିଧିଗଲିତମମୃତମିବ ରଚୟ ବଚନମନୁକୂଲମ୍ ।
ବିରହମିବାପନୟାମି ପୟୋଧରରୋଧକମୁରସି ଦୁକୂଲମ୍ ॥ ୩॥ କ୍ଷଣମଧୁନା
ପ୍ରିୟପରିରମ୍ଭଣରଭସବଲିତମିବ ପୁଲକିତମତିଦୁରବାପମ୍ ।
ମଦୁରସି କୁଚକଲଶଂ ବିନିବେଶୟ ଶୋଷୟ ମନସିଜତାପମ୍ ॥ ୪॥ କ୍ଷଣମଧୁନା
ଅଧରସୁଧାରସମୁପନୟ ଭାବିନି ଜୀବୟ ମୃତମିବ ଦାସମ୍ ।
ତ୍ୱୟି ବିନିହିତମନସଂ ବିରହାନଲଦଗ୍ଧବପୁଷମବିଲାସମ୍ ॥ ୫॥ କ୍ଷଣମଧୁନା
ଶଶିମୁଖି ମୁଖରୟ ମଣିରଶନାଗୁଣମନୁଗୁଣକଣ୍ଠନିନାଦମ୍ ।
ଶ୍ରୁତିୟୁଗଲେ ପିକରୁତବିକଲେ ମମ ଶମୟ ଚିରାଦବସାଦମ୍ ॥ ୬॥ କ୍ଷଣମଧୁନା
ମାମତିବିଫଲରୁଷା ବିକଲୀକୃତମବଲୋକିତମଧୁନେଦମ୍ ।
ମୀଲିତଲଜ୍ଜିତମିବ ନୟନଂ ତବ ବିରମ ବିସୃଜ ରତିଖେଦମ୍ ॥ ୭॥କ୍ଷଣମଧୁନା
ଶ୍ରୀଜୟଦେବଭଣିତମିଦମନୁପଦନିଗଦିତମଧୁରିପୁମୋଦମ୍ ।
ଜନୟତୁ ରସିକଜନେଷୁ ମନୋରମରତିରସଭାବବିନୋଦମ୍ ॥ ୮॥ କ୍ଷଣମଧୁନା
ଶ୍ଲୋକଃ ॥ ପ୍ରତ୍ୟୂହଃପୁଲକାଙ୍କୁରେଣ ନିବିଡାଶ୍ଲେଷେ ନିମେଷେଣ ଚ
କ୍ରୀଡାକୂତବିଲୋକିତେଽଧରସୁଧାପାନେ କଥାନର୍ମଭିଃ ।
ଆନନ୍ଦାଧିଗମେନ ମନ୍ମଥକଲାୟୁଦ୍ଧୋଽପି ଯସ୍ମିନ୍ନଭୂ-
ଦୁଦ୍ଭୂତସ୍ସ ତୟୋର୍ବଭୂବ ସୁରତାରମ୍ଭଃ ପ୍ରିୟଂ ଭାବୁକଃ ॥ ୮୧॥
ଶ୍ଲୋକଃ ॥ ଦୋର୍ଭ୍ୟାଂ ସଂୟମିତଃପୟୋଧରଭରେଣାପୀଡିତଃ ପାଣିଜୈ-
ରାବିଦ୍ଧୋ ଦଶନୈଃ କ୍ଷତାଧରପୁଟଃ ଶ୍ରୋଣୀତଟେନାହତଃ ।
ହସ୍ତେନାନମିତଃ କଚେଽଧରସୁଧାପାନେନ ସମ୍ମୋହିତଃ
କାନ୍ତଃ କାମପି ତୃପ୍ତିମାପ ତଦହୋ କାମସ୍ୟ ବାମା ଗତିଃ ॥ ୮୨॥
ଶ୍ଲୋକଃ ॥ ମାରାଙ୍କେ ରତିକେଲିସଙ୍କୁଲରଣାରମ୍ଭେ ତୟା ସାହସ-
ପ୍ରାୟଂ କାନ୍ତଜୟାୟ କିଞ୍ଚିଦୁପରି ପ୍ରାରମ୍ଭି ଯତ୍ସମ୍ଭ୍ରମାତ୍ ।
ନିଷ୍ପନ୍ଦା ଜଘନସ୍ଥଲୀ ଶିଥିଲତା ଦୋର୍ୱଲ୍ଲିରୁତ୍କମ୍ପିତଂ
ବକ୍ଷୋ ମୀଲିତମକ୍ଷି ପୌରୁଷରସଃ ସ୍ତ୍ରୀଣାଂ କୁତଃ ସିଧ୍ୟତି ॥ ୮୩॥
ଶ୍ଲୋକଃ ॥ ତସ୍ୟାଃ ପାଟଲପାଣିଜାଙ୍କିତମୁରୋ ନିଦ୍ରାକଷାୟେ ଦୃଶୌ
ନିର୍ଧୂତାଧାରଶୋଣିମା ବିଲୁଲିତସ୍ରସ୍ତସ୍ରଜୋ ମୂର୍ଧଜାଃ ।
କାଞ୍ଚୀଦାମଦରଶ୍ଲଥାଞ୍ଚଲମିତି ପ୍ରାତର୍ନିଖାତୈର୍ଦୃଶୋ-
ରେଭିଃ କାମଶରୈସ୍ତଦଦ୍ଭୁତମଭୂତ୍ପତ୍ୟୁର୍ମନଃ କୀଲିତମ୍ ॥ ୮୪॥
ଶ୍ଲୋକଃ ॥ ତ୍ୱାମପ୍ରାପ୍ୟ ମୟି ସ୍ୱୟଂବରପରାଂ କ୍ଷୀରୋଦତୀରୋଦରେ
ଶଙ୍କେ ସୁନ୍ଦରି କାଲକୂଟମପିବନ୍ମୂଢୋ ମୃଡାନୀପତିଃ ।
ଇତ୍ଥଂ ପୂର୍ୱକଥାଭିରନ୍ୟମନସା ବିକ୍ଷିପ୍ୟ ବାମାଞ୍ଚଲଂ
ରାଧାୟାଃ ସ୍ତନକୋରକୋପରି ଚଲନ୍ନେତ୍ରେ ହରିଃ ପାତୁ ବଃ ॥ ୮୫॥
ଶ୍ଲୋକଃ ॥ ବ୍ୟାଲୋଲଃ କେଶପାଶାସ୍ତରଲିତମଲକୈଃ ସ୍ୱେଦଲୋଲୌ କପୋଲୌ
ସ୍ପଷ୍ଟା ଦଷ୍ଟାଧରଶ୍ରୀଃ କୁଚକଲଶରୁଚା ହାରିତା ହାରୟଷ୍ଟିଃ ।
କାଞ୍ଚୀକାଞ୍ଚ୍ୟୁଦ୍ଗତାଶାଂ ସ୍ତନଜଘନପଦଂ ପାଣିନାଽଽଚ୍ଛାଦ୍ୟ ସଦ୍ୟଃ
ପଶ୍ୟନ୍ତୀ ଚାତ୍ମରୂପଂ ତଦପି ବିଲୁଲିତଂ ସ୍ରଗ୍ଧରେୟଂ ଧୁନୋତି ॥ ୮୬॥
ଶ୍ଲୋକଃ ॥ ଈଷନ୍ମୀଲିତଦୃଷ୍ଟିମୁଗ୍ଧହସିତଂ ସୀତ୍କାରଧାରାବଶା-
ଦବ୍ୟକ୍ତାକୁଲକେଲିକାକୁବିକସଦ୍ଦନ୍ତାଂଶୁଧୌତାଧରମ୍ ।
ଶ୍ୱାସୋତ୍କମ୍ପିପୟୋଧରୋପରି ପରିଷ୍ୱଙ୍ଗାତ୍କୁରଙ୍ଗୀଦୃଶୋ
var - : ଶାନ୍ତସ୍ତବ୍ଧପୟୋଧରଂ ଭୃଶପରି
ହର୍ଷୋତ୍କର୍ଷବିମୁକ୍ତନିଃସ୍ସହତନୋର୍ଧନ୍ୟୋ ଧୟତ୍ୟାନନମ୍ ॥ ୮୭ ॥
ଶ୍ଲୋକଃ ॥ ଅଥ କାନ୍ତଂ ରତିକ୍ଲାନ୍ତମପି ମଣ୍ଡନବାଞ୍ଛୟା ।
ନିଜଗାଦ ନିରାବାଧା ରାଧା ସ୍ୱାଧୀନଭର୍ତୃକା ॥ ୮୮॥
var -
ଶ୍ଲୋକଃ ॥ ଅଥ ସା ନିର୍ଗତାବାଧା ରାଧା ସ୍ୱାଧୀନଭର୍ତୃକା ।
ନିଜଗାଦ ରତିକ୍ଲାନ୍ତାଂ କାନ୍ତାଂ ମଣ୍ଡନବାଞ୍ଛୟା ॥
ଇତି ସହସା ସୁପ୍ରୀତଂ ସୁରତାନ୍ତେ ସା ନିତାନ୍ତଖିନ୍ନାଙ୍ଗୀ ।
ରାଧା ଜଗାଦ ସାଦରମିଦମାନନ୍ଦେନ ଗୋବିନ୍ଦମ୍ ॥ ୮୯॥
॥ ଗୀତମ୍ ୨୪ ॥
(ଅଥ ଚତୁର୍ୱିଂଶତିତମଃ ପ୍ରବନ୍ଧୋ ରାମକରୀରାଗେଣ ଯତିତାଲେ ଗୀୟତେ)
କୁରୁ ଯଦୁନନ୍ଦନ ଚନ୍ଦନଶିଶିରତରେଣ କରେଣ ପୟୋଧରେ ।
ମୃଗମଦପତ୍ରକମତ୍ର ମନୋଭବମଙ୍ଗଲକଲଶସହୋଦରେ ।
ନିଜଗାଦ ସା ଯଦୁନନ୍ଦନେ କ୍ରୀଡତି ହୃଦୟାନନ୍ଦନେ ॥ ୧॥
ଅଲିକୁଲଗଞ୍ଜନମଞ୍ଜନକଂ ରତିନାୟକସାୟକମୋଚନେ ।
ତ୍ୱଦଧରଚୁମ୍ବନଲମ୍ବିତକଜ୍ଜଲମୁଜ୍ଜ୍ୱଲୟ ପ୍ରିୟ ଲୋଚନେ ॥ ୨॥ ନିଜଗାଦ
ନୟନକୁରଙ୍ଗତରଙ୍ଗବିଲାସନିରାସକରେ ଶ୍ରୁତିମଣ୍ଡଲେ ।
ମନସିଜପାଶବିଲାସଧରେ ଶୁଭବେଶ ନିବେଶୟ କୁଣ୍ଡଲେ ॥ ୩॥ ନିଜଗାଦ
ଭ୍ରମରଚୟଂ ରଚୟନ୍ତମୁପରି ରୁଚିରଂ ସୁଚିରଂ ମମ ସମ୍ମୁଖେ ।
ଜିତକମଲେ ବିମଲେ ପରିକର୍ମୟ ନର୍ମଜନକମଲକଂ ମୁଖେ ॥ ୪॥ ନିଜଗାଦ
ମୃଗମଦରସବଲିତଂ ଲଲିତଂ କୁରୁ ତିଲକମଲିକରଜନୀକରେ ।
ବିହିତକଲଙ୍କକଲଂ କମଲାନନ ବିଶ୍ରମିତଶ୍ରମଶୀକରେ ॥ ୫॥ ନିଜଗାଦ
ମମ ରୁଚିରେ ଚିକୁରେ କୁରୁ ମାନଦ ମନସିଜଧ୍ୱଜଚାମରେ ।
ରତିଗଲିତେ ଲଲିତେ କୁସୁମାନି ଶିଖଣ୍ଡିଶିଖଣ୍ଡକଡାମରେ ॥ ୬॥ ନିଜଗାଦ
ସରସଘନେ ଜଘନେ ମମ ଶମ୍ବରଦାରଣବାରଣକନ୍ଦରେ ।
ମଣିରଶନାବସନାଭରଣାନି ଶୁଭାଶୟ ବାସୟ ସୁନ୍ଦରେ ॥ ୭॥ ନିଜଗାଦ
ଶ୍ରୀଜୟଦେବବଚସି ରୁଚିରେ ହୃଦୟଂ ସଦୟଂ କୁରୁ ମଣ୍ଡନେ । var ଶୁଭଦେ ହୃଦୟଂ
ହରିଚରଣସ୍ମରଣାମୃତନିର୍ମିତକଲିକଲୁଷଜ୍ୱରଖଣ୍ଡନେ ॥ ୮॥ ନିଜଗାଦ
ଶ୍ଲୋକଃ ॥ ରଚୟ କୁଚୟୋଃ ପତ୍ରଂ ଚିତ୍ରଂ କୁରୁଷ୍ୱ କପୋଲୟୋ-
ର୍ଘଟୟ ଜଘନେ କାଞ୍ଚୀମଞ୍ଚ ସ୍ରଜା କବରୀଭରମ୍ ।
କଲୟ ବଲୟଶ୍ରେଣୀଂ ପାଣୌ ପଦେ କୁରୁ ନୂପୁରା-
ବିତି ନିଗତିତଃ ପ୍ରୀତଃ ପୀତାମ୍ବରୋଽପି ତଥାକରୋତ୍ ॥ ୯୦॥
ଶ୍ଲୋକଃ ॥ ପର୍ୟଙ୍ଗୀକୃତନାଗନାୟକଫଣଶ୍ରେଣୀମଣୀନାଂ ଗଣେ
ସଙ୍କ୍ରାନ୍ତପ୍ରତିବିମ୍ବସଙ୍କଲନୟା ବିଭ୍ରଦ୍ୱପୁର୍ୱିକ୍ରିୟାମ୍ ।
ପାଦାମ୍ଭୋରୁହଧାରିବାରିଧିସୁତାମକ୍ଷ୍ଣାଂ ଦିଦୃକ୍ଷୁଃ ଶତୈଃ
କାୟବ୍ୟୂହବିଚାରୟନ୍ନୁପଚିତାକୂତୋ ହରିଃ ପାତୁ ବଃ ॥ ୯୧॥
ଶ୍ଲୋକଃ ॥ ଯନ୍ନିତ୍ୟୈର୍ୱଚନୈର୍ୱିରିଞ୍ଚଗିରିଜାପ୍ରାଣେଶମୁଖ୍ୟୈର୍ମୁହୁଃ
ନାନାକାରବିଚାରସାରଚତୁରୈର୍ନାଦ୍ୟାପି ନିଶ୍ଚୀୟତେ ।
ତତ୍ସର୍ୱୈର୍ଜୟଦେବକାବ୍ୟଘଟିତୈସ୍ସତ୍ସୂରିସଂଶୋଧିତୈ-
ରାଦ୍ୟଂ ବସ୍ତୁ ଚକାସ୍ତୁ ଚେତସି ପରଂ ସାରସ୍ୟସୀମାଜୁଷାମ୍ ॥ ୯୨॥
ଶ୍ଲୋକଃ ॥ ଯଦ୍ଗାନ୍ଧର୍ୱକଲାସୁ କୌଶଲମନୁଧ୍ୟାନଂ ଚ ଯଦ୍ୱୈଷ୍ଣବଂ
ଯଚ୍ଛୃଙ୍ଗାରବିବେକତତ୍ତ୍ୱରଚନାକାବ୍ୟେଷୁ ଲୀଲାୟିତମ୍ ।
ତତ୍ସର୍ୱଂ ଜୟଦେବପଣ୍ଡିତକବେଃ କୃଷ୍ଣୈକତାନାତ୍ମନଃ
ସାନନ୍ଦାଃ ପରିଶୋଧୟନ୍ତୁ ସୁଧିୟଃ ଶ୍ରୀଗୀତଗୋବିନ୍ଦତଃ ॥ ୯୩॥
ଶ୍ଲୋକଃ ॥ ସାଧ୍ୱୀ ମାଧ୍ୱୀକଚିନ୍ତା ନ ଭବତି ଭବତଃ ଶର୍କରେ କର୍କଶାସି
ଦ୍ରାକ୍ଷେ ଦ୍ରକ୍ଷ୍ୟନ୍ତି କେ ତ୍ୱାମମୃତ ମୃତମସି କ୍ଷୀରନୀରଂ ରସସ୍ତେ ।
କ୍ରନ୍ଦ କାନ୍ତାଧର ଧରଣିତଲଂ ଗଚ୍ଛ ଯଚ୍ଛାନ୍ତିଭାବଂ
ଯାବଚ୍ଛୃଙ୍ଗାରସାରସ୍ୱତମିହ ଜୟଦେବସ୍ୟ ବିଷ୍ୱଗ୍ୱଚାଂସି ॥ ୯୪॥
ଶ୍ଲୋକଃ ॥ ଶ୍ରୀଭୋଜଦେବପ୍ରଭବସ୍ୟ ରାଧାଦେବୀସୁତଶ୍ରୀଜୟଦେବକସ୍ୟ । var - ରାମାଦେବୀ
ପରାଶରାଦିପ୍ରିୟବର୍ଗକଣ୍ଠେ ଶ୍ରୀଗୀତଗୋବିନ୍ଦକବିତ୍ୱମସ୍ତୁ ॥ ୯୫॥
॥ ଇତି ଶ୍ରୀଜୟଦେବକୃତୌ ଗୀତଗୋବିନ୍ଦେ ସୁପ୍ରୀତପୀତାମ୍ବରୋ ନାମ ଦ୍ୱାଦଶଃ ସର୍ଗଃ ॥
॥ ଇତି ଗୀତଗୋବିନ୍ଦଂ ସମାପ୍ତମ୍ ॥
The following additional verses are found in some editions:
at the end of Sarga 11, after gItaM 22
ସାନନ୍ଦଂ ନନ୍ଦସୂନୁର୍ଦିଶତୁ ମିତପଦଂ ସମ୍ମଦଂ ମନ୍ଦମନ୍ଦଂ
ରାଧାମାଧାୟ ବାହ୍ୱୋର୍ୱିବରମନୁଦୃଢଂ ପୀଡୟନ୍ ପ୍ରୀତିୟୋଗାତ୍ ।
ତୁଙ୍ଗୌ ତସ୍ୟା ଉରୋଜାବତନୁରବତନୋର୍ନିର୍ଗତୌ ମାସ୍ମ ଭୂତାଂ
ପୃଷ୍ଠଂ ନିର୍ଭିଦ୍ୟ ତସ୍ମାଦ୍ବଲିରିତି ବଲିତଗ୍ରୀବମାଲୋକୟନ୍ ବଃ ॥
at the end of Sarga 12
ସାଧୂନାଂ ସ୍ୱତ ଏବ ସମ୍ମତିରିହ ସ୍ୟାଦେବ ଭକ୍ତ୍ୟାର୍ଥିନାଂ
ଆଲୋଚ୍ୟ ଗ୍ରଥନଶ୍ରମଂ ଚ ବିଦୁଷାମସ୍ମିନ୍ଭବେଦାଦରଃ ।
ଯେ କେଚିତ୍ ପରକୃତ୍ୟୁପଶ୍ରୁତିପରାସ୍ତାନର୍ଥୟେ ମତ୍କୃତିଂ
ଭୂୟୋ ବୀକ୍ଷ୍ୟ ବଦନ୍ତ୍ୱବଦ୍ୟମିତି ଚେତ୍ସା ବାସନା ସ୍ଥାସ୍ୟତି ॥
ଇତ୍ଥଂ କେଲିତଲୈର୍ୱିହୃତ୍ୟ ଯମୁନାକୂଲେ ସମଂ ରାଧୟା
ତଦ୍ରୋମାବଲିମୌକ୍ତିକାବଲିୟୁଗେ ବେଣୀଭ୍ରମଂ ବିଭ୍ରତି ।
ତତ୍ରାହ୍ଲାଦିକୁଚପ୍ରୟୋଗଫଲୟୋର୍ଲିପ୍ସାବତୋର୍ହସ୍ତୟୋ-
ର୍ୱ୍ୟାପାରାଃ ପୁରୁଷୋତ୍ତମସ୍ୟ ଦଦତୁ ସ୍ଫୀତାଂ ମୁଦଂ ସମ୍ପଦମ୍ ॥
Comments
Post a Comment