ଦଶାବତରବର୍ଣନଂ
ମାର୍କଣ୍ଡେୟ ଉବାଚ
ଅବତାରାନହଂ ବକ୍ଷ୍ୟେ ଦେବଦେବସ୍ୟ ଚକ୍ରିଣଃ ।
ତାଞ୍ଶୃଣୁଷ୍ୱ ମହୀପାଲ ପବିତ୍ରାନ୍ ପାପନାଶନାନ୍ ॥ ୧॥
ଯଥା ମତ୍ସ୍ୟେନ ରୂପେଣ ଦତ୍ତା ବେଦାଃ ସ୍ୱୟମ୍ଭୁବେ ।
ମଧୁକୈଟଭୌ ଚ ନିଧନଂ ପ୍ରାପିତୌ ଚ ମହାତ୍ମନା ॥ ୨॥
ଯଥା କୌର୍ମେଣ ରୂପେଣ ବିଷ୍ଣୁନା ମନ୍ଦରୋ ଧୃତଃ ।
ତଥା ପୃଥ୍ୱୀ ଧୃତା ରାଜନ୍ ବାରାହେଣ ମହାତ୍ମନା ॥ ୩॥
ତେନୈବ ନିଧନଂ ପ୍ରାପ୍ତୋ ଯଥା ରାଜନ୍ ମହାବଲଃ ।
ହିରଣ୍ୟାକ୍ଷୋ ମହାବୀର୍ୟୋ ଦିତିପୁତ୍ରୋ ମହାତନୁଃ ॥ ୪॥
ଯଥା ହିରଣ୍ୟକଶିପୁସ୍ତ୍ରିଦଶାନାମରିଃ ପୁରା ।
ନରସିଂହେନ ଦେବେନ ପ୍ରାପିତୋ ନିଧନଂ ନୃପ ॥ ୫॥
ଯଥା ବଦ୍ଧୋ ବଲିଃ ପୂର୍ୱଂ ବାମନେନ ମହାତ୍ମନା ।
ଇନ୍ଦ୍ରସ୍ତ୍ରିଭୁବନାଧ୍ୟକ୍ଷଃ କୃତସ୍ତେନ ନୃପାତ୍ମଜ ॥ ୬॥
ରାମେଣ ଭୂତ୍ୱା ଚ ଯଥା ବିଷ୍ଣୁନା ରାବଣୋ ହତଃ ।
ସଗଣାଶ୍ଚଦଭୁତା ରାଜନ୍ ରାକ୍ଷସା ଦେବକଣ୍ଟକାଃ ॥ ୭॥
ଯଥା ପରଶୁରାମେଣ କ୍ଷତ୍ରମୁତ୍ସାଦିତଂ ପୁରା ।
ବଲଭଦ୍ରେଣ ରାମେଣ ଯଥା ଦୈତ୍ୟଃ ପୁରା ହତଃ ॥ ୮॥
ଯଥା କୃଷ୍ଣେନ କଂସାଦ୍ୟା ହତା ଦୈତ୍ୟାଃ ସୁରଦ୍ୱିଷଃ ।
କଲୌ ପ୍ରାପ୍ତେ ଯଥା ବୁଦ୍ଧୋ ଭବେନ୍ନାରାୟଣଃ ପ୍ରଭୁଃ ॥ ୯॥
କଲ୍କିରୂପଂ ସମାସ୍ଥାୟ ଯଥା ମ୍ଲେଚ୍ଛା ନିପାତିତାଃ ।
ସମାପ୍ତେ ତୁ କଲୌ ଭୂୟସ୍ତଥା ତେ କଥୟାମ୍ୟହମ୍ ॥ ୧୦॥
ହରେରନନ୍ତସ୍ୟ ପରାକ୍ରମଂ ଯଃ ଶୃଣୋତି ଭୂପାଲ ସମାହିତାତ୍ମା ।
ମୟୋଚ୍ୟମାନଂ ସ ବିମୁଚ୍ୟ ପାପଂ ପ୍ରୟାତି ବିଷ୍ଣୋଃ ପଦମତ୍ୟୁଦାରମ୍ ॥ ୧୧॥
ଇତି ।
ନରସିଂହପୁରାଣ ଅଧ୍ୟାୟ ୩୬ ଶ୍ଲୋକସଙ୍ଖ୍ୟା ୧୧
ଶ୍ରୀନରସିଂହପୁରାଣେ ହରେଃ ପ୍ରାଦୁର୍ଭାବାନୁକ୍ରମଣେ ଷଟତ୍ରିଂଶୋଽଧ୍ୟାୟଃ ॥ ୩୬॥
Comments
Post a Comment