ଶ୍ରୀଜଗନ୍ନାଥାଷ୍ଟକମ୍ ୨

କଦାଚିଚ୍ଛ୍ରୀକ୍ଷେତ୍ରେ ବିବୁଧପୁରଧାମ୍ନି ପ୍ରିୟତମେ

କଦା ସିଂହଦ୍ୱାରେ ପତିତଜନତାତ୍ରାଣବପୁଷମ୍ ।

କଦା ଗର୍ଭେ ଗେହେ ନିଖିଲମଣିସିଂହାସନଗତଂ

ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୧॥

          କଦା ଶଙ୍ଖେ ସ୍ଥିତ୍ୱା ମଧୁରବଡଦାଣ୍ଡେ ହି ବିଚରନ୍

          ମହାରଜ୍ଜୁଂ ଧୃତ୍ୱା ଜୟତୁ ଶରଣଂ ଦିବ୍ୟପୁରୁଷମ୍ ।

          ରଥଂ ସ୍ପୃଷ୍ଟ୍ୱା ପ୍ରେମ୍ଣା ବିରଲରଥୟାତ୍ରାସୁରଭିତଂ

          ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୨॥

କଦା ଦ୍ୱାବିଂଶେଶଂ କୁମତିହରପାବଚ୍ଛନିଚୟେ

ପିକାଖ୍ୟେ ବୈକୁଣ୍ଠେ କୁସୁମତୁଲସୀଦିବ୍ୟବିପିନେ ।

ମହାମ୍ଭୋଧେସ୍ତୀରେ ତ୍ରିଦିବଭୁବନଦ୍ୱାରଲଲିତେ

ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୩॥

          ସୁକାନ୍ତଂ ଶ୍ରୀକାନ୍ତଂ ନିଗମପୁରଭାନ୍ତଂ ନିରୁପମଂ

          କଦା ତଂ ଗୋପାଲଂ ରଘୁବରବିଶାଲଂ ବଲପତିମ୍ ।

          ମହାନ୍ତଂ ବେଦାନ୍ତଂ ବିପୁଲଦନୁଜାନ୍ତଂ ସୁରପତିଂ

          ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୪॥

ବଟଂ ସ୍ପୃଷ୍ଟ୍ୱା ଦୃଷ୍ଟ୍ୱା ବିମଲବିମଲାଦେବତରୁଣୀଂ

ତଦା ପଦ୍ମାଂ ଛଦ୍ମାଂ କମଲନିଲୟାମନ୍ନଜନନୀମ୍ ।

ପ୍ରସାଦଂ ସମ୍ପ୍ରାପ୍ୟ କ୍ଷୁଧିତଜନତାନନ୍ଦବିପଣୌ

ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୫॥

          ଠନେତ୍ରାଭ୍ୟାଂ ଦୀପ୍ତଂ  ସ୍ୱଜନବଲଭଦ୍ରେଣ ସହିତଂ

          ସୁଭଦ୍ରାମଧ୍ୟସ୍ଥଂ ରିପୁଦଲନସୌଦର୍ଶନୟୁତମ୍ ।

          ମହାଦାରୁସ୍ଫୁର୍ଜତ୍ତରଲରସିକଶ୍ରୀହରିବରଂ

          ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୬॥

କଦା ନୀଲେ ଚକ୍ରେ ସୁବିତତପତାକା ମଲହରୀ

ପ୍ରକାଶ୍ୟ ମାଧୁର୍ୟଂ ବିଲସତିତରାଂ ମୁଗ୍ଧମନସା ।

ପୁରୀପ୍ରାନ୍ତେ ଶାନ୍ତଂ ବିହଗଗରୁଡସ୍ତମ୍ଭନିକଟଂ

ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୭॥

          ନରେନ୍ଦ୍ରେ କାସାରେ ସଜଲମଧୁରେ ତୀର୍ଥବିଧୁରେ

          କଦା ଜନ୍ମସ୍ଥାନେ ନବଦିବସୟାତ୍ରାବିଲସିତେ ।

          ସଦା ସ୍ୱାତ୍ମାରାମଂ ସକଲଜନକାମଂ ଗୁଣମୟଂ

          ଜଗନ୍ନାଥଂ ନତ୍ୱା ଚରମଚିରସୌଖ୍ୟଂ ଭବତୁ ମେ ॥ ୮॥

ସଦାନନ୍ଦାତ୍ମଜସ୍ତୋତ୍ରଂ ଯଃ ପଠେତ୍ ସତତଂ ସୁଧୀଃ ।

ସର୍ୱପାପବିଶୁଦ୍ଧାତ୍ମା ବିଷ୍ଣୁଲୋକଂ ସ ଗଚ୍ଛତି ॥ ୯॥

ଇତି ପ୍ରଦୀପ୍ତନନ୍ଦଶର୍ମବିରଚିତଂ ଶ୍ରୀଜଗନ୍ନାଥାଷ୍ଟକଂ ସମ୍ପୂର୍ଣମ୍ ।